ዛማረቱዋ ካፖ የጸቴዳ ሳባ፥ ማዛሙርያ

1 ሳኣን አሳ ኡባዉ፥ ህንተ ቃላ ቂሲደ፥

ናሸቻን ጾሳ ጋላትተ።

2 "ጾሳ ሱንይ ቦንቼቶ!" ጊደ የጽተ፤

ቦንቾ ጋላታ አዉ እምተ።

3 ጾሳዉ ሀዋዳን ያግተ፤

"ነ ኦሶቱ ዋን ማላልስያዋንቴ!

ነ ዎልቃይ ዳሬዳ ድራዉ፥

ነ ሞርከቱ ያሻዉ ነ ስንን ኮኮሪኖ።

4 ሳኣን ደእያ ኡባቱ ነዉ ጎይኒኖ፤

ኔና ሳቢኖ፤

ነ ሱንዉ ጋላታ የጺኖ" ያግተ።

5 ሃይተ፤ ጾሳይ ኦዳዋ በእተ፤

እ አሳ ግዶን ማላልስያ ኦሱዋ ኦዳ።

6 እ አባ ሃ ሻኬዳ፤✝66:6 ከሳ 14:21፤ ኢያሳ 3:14-17

ቃይ በን ኑ አዎቱ ዮርዳኖሳ ሻፋ፥

ባረንቱ ገድያን ሀመቲደ፥ መላ ቢታን ፕኔድኖ።

ሄዋን እ ኦዳባን ኑን ናሸቴዶ።

7 እ ባረ ዎልቃን መናዉ ሞዴ።

ካዉተቱዋ ባረ አይፍያን ጼሌ፤

ሄዋ ድራዉ፥ ማካልያዋንቱ አ ቦላ ደንዶፕኖ።

8 አሳቶ፥ ኑ ጾሳ ጋላትተ፤

ህንተ አ ጋላትያ ጋላታይ ስሰቶ።

9 እ ኑና ፓጻ ዎዳ፤

ኑን ኩንደናዳን ናጌዳ።

10 አቤት ጾሳዉ፥ ኔን ኑና ፓጫዳ፤

ብራ ጌሻናዉ ታማን ፓጭያዋዳን፥

ኑና ጌሻዳ።

11 ኔን ኑና ጲርያን ገልሳዳ።

ኑ ዞኩዋንካ ዴጾባ ቶሳዳ።

12 ሞርከቱ ኑ ሁጲያን ቶጋናዳን ኦዳ።

ኑን ሃ ግዱዋናነ ታማ ግዱዋና አዶ፤

ሽን ሀእ ኑና እሻልያ ሳ አሃዳ።

13 ታን ጹግያ ያርሹዋና ነ ጎልያ ገላደ፥

ታ ቃንግያ ነዉ ጋና።

14 ታን መቶቴዳ ዎደ፥

ታ ዶናን ሺቀቴዳ ቃንግያ፥

ታ እንጻርሳፐ ከሴዳዋ፥ ታን ጋና።

15 ታን ነዉ ጹጊደ ያርሽያ፥

ዶርሳ ኦርገቱዋ ሺሻና።

ኮሩማ ቦራቱዋነ ዴሻ ኦርገቱዋ ነዉ ያርሻና፤

ሄ ያርሾቱዋ ጩዋይ ሳሉዋ ጋካና።

16 ህንተኖ፥ ጾሳዉ ያይያዋንቶ፥

ኡባቱ ሃ ዪደ፥ ስስተ።

ጾሳይ ታዉ ኦዳዋ ታን ህንተዉ ኦዳና።

17 ታ ቃላ ቁ ኦደ ታን ጾሳ ዎሳድ፤

ታ እንጻርሳን አዉ ጋላታ ሺሻድ።

18 ታን ታ ዎዛናን ናጋራ ገንደንቶ፥

ጎዳይ ታና ስሰና።

19 ሽን ጾሳይ ቱሙዋፐ ታና ስሴዳ፤

ታ ዎሳካ ሀይዜዳ።

20 ጾሳይ ታ ዎሳ እጽቤና ድራዉ፥

ቃይ አገና ባረ ሲቁዋ ታዉ ድግቤና ድራዉ፥ ጋላቴቶ።