መቱዋ ዎደ ዎሳ
ዳውት ዎሴዳ ዎሳ።
1 አቤት ጎዳዉ፥ ታን ህዬሳነ፥
መቶታንቻ አሳ ግድያ ድራዉ፥
ታ ዋሱዋ ስሳደ፥ ታዉ አላ።
2 ታን ጾሳ አሳ ግድያ ድራዉ፥
ታና ፓጻ ዎ።
ኔናን አማነትያ ታና፥ ነ ቆማ አሻ።
ኔን ታ ጾሳ።
3 አቤት ጾሳዉ፥ ታን ጋላሳ ኡባ
ኔኮ ዋስያ ድራዉ፥
ታዉ ቃረታ።
4 አቤት ጾሳዉ፥ ታን ታ ሸምፑዋፐ
ኔና ዎስያ ድራዉ፥
ታና፥ ነ ቆማ ናሸቻ።
5 አቤት ጾሳዉ፥ ኔን ኬካነ አቶ ግያዋ፤
ኔና ጼስያ ኡባዉ ነ ሲቁ ዳራ።
6 አቤት መና ጎዳዉ፥ ታ ዎሳ ስሳ፤
ታን ዋትዋትያ ዋትዋቱዋ ሀይዛ።
7 ኔን ታዉ አልያ ድራዉ፥
ታ መቱዋ ጋላሳን ታን ኔኮ ዋሳይ።
8 አቤት ጎዳዉ፥ ጾሳቱዋ ግዶን ነ ማል ባዋ፤
ነ ኦሱዋ ማላ ኦሱካ ባዋ።
9 አቤት ጎዳዉ፥ ኔን መዳ ካዉተ አሳይ ኡባይ ዪደ፥86:9 ሳፃ 15:4
ነ ስንን ጉልባታና፤ ኡንቱንቱ ነ ሱን ቦንቻና።
10 አያዉ ጎፐ፥ ኔን ዎልቃማ፤
ኔን ማላልስያባ ኦሳ።
ነ ጻላላይ ጾሳ።
11 አቤት መና ጎዳዉ፥ ታን ነ ቱሙዋን ሀመታና ማላ፥
ታና ነ ኦግያ ታማርሳ።
ታን ነ ሱንዉ ያያና ማላ፥
ታዉ እት ዎዛና እማ።
12 አቤት ጎዳዉ ታ ጾሳዉ፥ ታን ኔና፥
ታ ኩመን ዎዛናፐ ጋላታና።
ነ ሱን መናዉ ቦንቻና።
13 አያዉ ጎፐ፥ ነ ሲቁ ታዉ ዳራ፤
ኔን ታና ዱፉዋን ገልያዋፐ አሻዳ።
14 አቤት ጎዳዉ፥ ኦቶራንቻ አሳቱ ታ ቦላ ደንዴድኖ፤
ዳጋንያ አሳቱዋ ጩጉ ታና ዎናዉ ኮዬ።
ኡንቱንቱ ኔና አላለ ጊክኖ።
15 ሽን አቤት ጎዳዉ፥ ኔን
ቃረትያነ ማርያ ጾሳ፤
ሀንቀታናዉ ጋምኣሳ፤
ሲቁነ አማነቱሳይ ዳርያዋ።
16 ታኮ ስማደ ታዉ ቃረታ።
ነ ቆማዉ ዎልቃ እማ፤
ነ ቆማት ናኣ ታና አሻ።
17 አቤት መና ጎዳዉ፥
ነ ኬካተ ማላታ ታና በሳ።
ኔን ታና ማዴዳዋነ ምንዳዋ በእያ ዎደ፥
ታና እጽያዋንቱ ሄዋን ዬላታና።