ጾሳይ ኡባ ቦላ ፕርድያዋ
1 አቤት መና ጎዳዉ፥ ኔን ኩሽያ ጭገትያ ጾሳ።
አቤት ኩሽያ ጭገትያ ጾሳዉ፥ ነ ቦንቹዋ በሳ።
2 አቤት ሳኣ ፕርድያዎ፥ ደንዳ፤
ኦቶራንቻቶ በስያ ሙሩዋ እማ።
3 አቤት መና ጎዳዉ፥ አዉደ ጋካናዉ ጋምአኔ?
ኢታቱ አዉደ ጋካናዉ ናሸታኔ?
4 ኢታ ኦያ ኡባቱ፥
ባረንቱ ኦቶሮ ቃላ ሃሳዪኖ፤
ኡንቱንቱ ጬቀቲኖ።
5 አቤት መና ጎዳዉ፥ ኡንቱንቱ ነ አሳ ሊቂሲኖ፤
ነ ላታ ናቂኖ።
6 ኡንቱንቱ አምኤቱዋነ በተቱዋ ዎኖ፤
አዉ ባይናዋንታካ ዎኖ።
7 ያቲደ ኡንቱንቱ፥ "መና ጎዳይ ኑና በኤና፤
ያቆባ ጾሳይ አኬከና" ያጊኖ።
8 ህንተኖ፥ አሳ ግዶፐ አዳ ዳማቶ፥ አኬክተ!
ህንተኖ ኤያቶ፥ አዉደ ኤራንቻ ግዳንቴ?
9 ሀይ መዳ ጾሳይ ስሰኔ?
አይፍያ መዳዌ በኤኔ?
10 ካዉተ ሴርያዌ ሙረኔ?
አሳ ኤራ ታማርስያዌ ባረዉ ኤረኔ?94:10 1 ቆሮ. 3:20
11 መና ጎዳይ አሳ ቆፋይ መላ ግድያዋ ኤሬ።
12 አቤት መና ጎዳዉ፥ ኔን ሴርያዌነ
ነ ህግያፐ ታማርስያ አሳይ አንጀቴዳዋ።
13 ኢታቱ ኩንድያ ኦላይ ቦከታና ጋካናዉ፥
መቱ ጋክያ ጋላሳን ኔን አ ሸምፕሳሳ።
14 መና ጎዳይ ባረ አሳ አገና፤
እ ባረ ላታ አገና።
15 ፕርዳይ ስሚደ ጽሎ ፕርዳ ግዳናዋ፤
ዎዛና ሱረቱ ኡባይ ሄ ጽሎ ፕርዳ ማዳና።
16 ማካላንቻቱዋ ቦላ
ታ ድራዉ ደንድያዌ ኦኔ?
ኢታ ኦያዋንቱና
ታ ድራዉ ኤቀቴዳዌ ኦኔ?
17 መና ጎዳይ ታና ማደነንቶ፥
ታን ኤለካ ዱፉዋን ገላደ ስርጵ ጋና ሽን።
18 አቤት መና ጎዳዉ፥ ታን፥
"ታ ገዲ ሀልጼ" ያጌዳ ዎደ፥
አገና ነ ሲቁ ታዉ ዘምፖ ግዴዳ።
19 ታና ህርጋይ ዎያ ዎደ፥
ኔን ታና ዎፑ ኦደ ናሸቻሳ።
20 ህግያ ባለያ ጌላ ዳናቱዋና
ኔን ዙፐታይ?
21 ጽሎቱዋ ዎናዉ ኡንቱንቱ እትፐ ቶበቲኖ፤
ሱረቱዋ ቦላ ሀይቁዋ ፕርዲኖ።
22 ግዶፐነ፥ መና ጎዳይ ታን ባቃታ አቴዳ ሳኣ፤
ታ ጾሳይ ታን ቆሰትያ ዛላ።
23 ኡንቱንቱ ኢታተ ድራዉ፥ እ ኡንቱንታ ሙራና፤
ኡንቱንቱ ናጋራ ድራዉ፥ እ ኡንቱንታ ይሳና፤
ኤ፥ መና ጎዳይ ኑ ጾሳይ ኡንቱንታ ይሳና።