Gênesis 27

Isaka ali’mudosya Yakobo

1 Yav’aga aho Isaka wakiku’laga na minso gakwe gahofulaga, lu’siku' lu’mo wamwitanaga mwane muhanya Esau na ku’muwi’la ati', "Mwana wanne!" Nawe witawu’kaga, "Kalame! Ene aha." 2 Isaka wamuwi’laga ati', "Lingaga, ene gi’si' nakiku’laga. Lu’siku' lwa ku’fwa kwanne nkalu’manya. 3 Hohene nu’ku’lomba u’sole vilwani’lo vyako, ndunguli ya masonga na wu’ta wako, u’ye mu masenga u’kahi’ge ndimu. 4 Haho u’mbezezye ki’liwa ki’semu ki’ti' i’vi ntogilwe, u’ndetele ndye, ki’gele nku’dosye aho nkaali' ku’fwa."

5 Kasinaga, itungo i’lo Isaka wav’age ali’su’nsu’mu’la na mwane Esau, Lebeka wav’age apu’li’ki’zizye. Yav’aga Esau aho wayaga mu masenga ku’kahi’ga ki’gele akalete masapi’i’lo ku’mwa ise, 6 Lebeka wamuwi’laga mwane Yakobo ati', "Lingaga, namwigagwa so ali’muwi’la muku’lu’yo Esau ati', 7 ‘Yaga u’kahi’ge ndimu, u’mbezezye ki’liwa ki’semu ki’ti' i’vi ntogilwe, u’ndetele ndye. Haho nku’ku’dosya ha mbele yamwa Gu’ku' Mulungu aho nkaali' ku’fwa.’ 8 Mwana wanne, gi’si' degeleka i’cho nu’ku’wi’la na u’ki’v’ezye. 9 Yaga mu idale lya mbu’li, u’kandetele tu’di’lana tu’v’i’li' tu’soga, ki’gele muv’ezezye so ki’liwa ki’semu i’cho aki’togilwe. 10 Haho u’mufili’le alye, ki’gele aku’dosye aho akaali' ku’fwa." 11 Yakobo wasu’v’yaga ati', "Ali’vi muku’lu' wanne ali' na wu’yenze muv’i’li' gose, nanne ni’na ndi’li' nnelezu! 12 Yi’ku’v’a vihe u’lu' v’av’a ampalapasye? Nanne nkwigela nu’muyenga. Ku’nguno yeni’yo nkwiletela nfwizi' ku’leka lu’v’ango." 13 Nnina wamuwi’laga ati', "Mwana wanne, nfwizi' yako yi’ndime ene, ev’e v’ezya du' i’vyo naku’wi’laga. Yaga u’kandetele twenu’to tu’di’lana."

14 I’vi hu' i’vyo Yakobo wayaga ku’katu’leta twenu’to tu’di’lana, na wamupaga nnina. Haho nnina watekaga ki’liwa ki’soga ki’ti' i’vyo ise wamwa Yakobo atogilwe. 15 Hangi' Lebeka wingi’laga mu nnumba, wasolaga vizwalo visoga vyamwa Esau mwana wakwe muhanya, i’vyo wav’age navyo, nawe wamuzwi’kaga Yakobo mwana wakwe mudo. 16 Hangi' wamuzwi’kaga mu makono ndi’li' ya tu’di’lana, na mu lwandi' lwa ndi’li' nnelezu ya nhingo yakwe. 17 Haho wamupaga cheni’cho ki’liwa ki’soga na mugate u’go wagwiv’angaga.

18 Hohene Yakobo wayaga ku’mwa ise na ku’muwi’la ati', "V’av’a!" Nawe witawu’kaga ati', "Kalame, ene aha, mwana wanne! Ev’e u’li' nde?" 19 Yakobo wasu’v’yaga ati', "Ene ni' Esau, muv’yalwa wako wa mbele. Nav’ezyaga ki’ti' i’vyo wali' wambwi’laga. Nu’ku’lomba v’av’a, u’wu’ke wikale, u’lye masapi’i’lo ganne ki’gele u’ndosye." 20 Ali’vi Isaka wamuwu’zyaga ati', "Yakwi’laga vihe ku’gwamuzya wangu' vyeni’vyo, mwana wanne?" Nawe Yakobo wasu’v’yaga ati', "Gu’ku' Mulungu, Mulungu wako, hu' mwene wangwasyaga."

21 Haho Isaka wamuwi’laga ati', "Mwana wanne, egela aha nku’palapasye, ki’gele manye u’lu' nhana ev’e hu' u’li' mwana wanne Esau ninga ng’o." 22 Hohene Yakobo wamwegelaga ise Isaka, nawe wamupalapasyaga na ku’yomba, "Muzwi gwamwa Yakobo, sumbwa makono gamwa Esau." 23 Ali’vi akamumanyile ku’nguno makono gakwe gav’aga na wu’yenze ki’ti' wa muku’lu’ye Esau. Haho Isaka witu’u’laga visoga ki’gele amudosye mwane.

24 Hangi' wamuwu’zyaga ati', "Nhana ev’e hu' u’li' mwana wanne Esau?" Yakobo wasu’v’yaga ati', "Ene hu' mwene!" 25 Haho ise wamuwi’laga ati', "Egezya bi’hi' ki’liwa cha masapi’i’lo gako mwana wanne ndye, ki’gele nku’dosye." Hohene Yakobo wamwegezezyaga ki’liwa cheni’cho, nawe walyaga. Hangi' wamuletelaga na ki’neneko cha muzabibu nacho wanywaga. 26 Haho ise wamuwi’laga ati', "Egela bi’hi', mwana wanne, u’nsu’ne." 27 Hohene Yakobo wamwegelaga ise na ku’musu’na. Isaka aho wigagwa isu' lya vizwalo vya mwana wakwe, wamudosyaga ku' ku’yomba ati',

"Lingaga, isu' isoga lya mwana wanne

li’li' ki’ti' mugu’nda u’go Gu’ku' Mulungu wagu’dosizye!

28 Mulungu akwiti’le lu’me ku’fuma ku' ilunde.

Aku’pe wu’sav’i wa nsi' ya lu’tongo,

haki’mo na wu’poni wa viliwa na ki’neneko ku' wingi.

29 V’antu' v’a nsi' v’aku’tu’mami’le,

na makabi’la gaku’ku’v’i’i’le.

U’v’e gu’ku' wa v’adu’gu’yo,

na v’ana v’amwa nnoko v’aku’ku’v’i’i’le.

Afwizi’i’lwe u’yo alaku’fwizi’i’le,

na adosiwe u’yo alaku’dosye!"

Esau nawe ali’lomba lu’v’ango

30 Yav’aga aho Isaka wamali’laga ku’mudosya, Yakobo wahafumaga henanho. Aho wahafumaga du' hamwa ise, Esau muku’lu’ye nawe wizaga ku’fuma ku' ihi’ga. 31 Esau nawe wasangwa wav’ezyaga ki’liwa ki’soga na ku’ki’fila ku’mwa ise, haho wamuwi’laga ati', "V’av’a wanne, wu’ka u’lye masapi’i’lo ganne, ene mwana wako, ki’gele u’ndosye!" 32 Ise Isaka wawu’zyaga ati', "Ev’e u’li' nde?" Nawe wasu’v’yaga, "Ene ni' Esau, muv’yalwa wako wa mbele." 33 Henanho Isaka watetemaga ku' wov’a muno na ku’yomba, "Ali' nde u’yo wahi’gaga na ku’ndetela masapi’i’lo ga nyama aho ev’e wali' u’kaali' kwiza? Nanne nalyaga na namalaga ku’mudosya, nawe nhana aku’dosiwa."

34 Yav’aga aho Esau wigagwa mihayo zyamwa ise, wali’laga ki’li’lo ki’hanya muno ku' wu’satu. Hangi' wamuwi’laga ise ati', "V’av’a wanne nu’ku’lomba nanne u’ndosye!" 35 Ali’vi Isaka wamuwi’laga ati', "Muzunayo wizaga ku' wu’yengani nawe wasolaga lu’v’ango lwako." 36 Esau wayombaga, "Hene ali’witanwa Yakobo! Ku’nguno ya wu’yengani wakwe, wasolaga lwandi' lwa lole yanne ka wu’v’i’li'. Wasolile lwandi' lwa lole yanne ya wu’v’yalwa wa mbele, hangi' wasolaga lu’v’ango lwanne!" Haho wamuwu’zyaga ise ati', "Vihe, v’av’a u’kandekelile lu’v’ango ninga lu’mo?" 37 Isaka wasu’v’yaga ati', "Lingaga, namalaga ku’muv’ezya av’e gu’ku' wako. V’adu’gu’ye v’ose nav’av’ezyaga v’av’e v’akumba v’akwe. Namuv’ezyaga av’e na wu’poni wa viliwa na ki’neneko. Mwana wanne, alev’e gi’si' nku’ku’v’ezezya ki'?" 38 Esau wamuwu’zyaga ise ati', "V’av’a hu' ku’yomba ati', u’li' na lu’v’ango lu’mo du'? V’av’a wanne ndosye nanne!" Hangi' Esau wali’laga ku' muzwi muhanya.

39 Ali’vi Isaka ise wasu’v’yaga ati',

"Lolaga, wikalo wako wu’ku’v’a ku’le na nsi' ya lu’tongo,

na lu’me lwa ku' ilunde lu’ku’v’a ku’le nanho.

40 Wikalo wako wu’ku’v’a wa lu’panga,

na u’lamutu’mami’le muzunayo.

Ali’vi aho u’linyugumpu’zye, u’layi’v’i’nze segeya ya wu’temi wakwe."

Yakobo ali’mupeela Esau

41 Hohene Esau wamutu’u’li’laga nsika muzunaye, ku’nguno ya lu’v’ango u’lo wapiv’agwa na ise. Wiyombelaga ati', "Nsiku' zya ku’muli’la v’av’a zyegelaga, haho ndamuwu’lage muzuna wanne Yakobo."

42 Yav’aga aho Lebeka wigagwa mmola ya mihayo zyamwa Esau mwane muhanya, watu’maga ku’kamwitana mwane mudo Yakobo. Aho wizaga wamuwi’laga ati', "Mwana wanne, Lingaga! Muku’lu’yo ali’wihu’li’kya moyo gwakwe ku' ndaka ya ku’koov’a ku’ku’wu’laga. 43 Mwana wanne gi’si' u’ndegeleke. Wu’ka u’peelele ku' Halani ku’mwa ilu’mbu' lyanne Labani. 44 U’kikale nawe mpaka ki’sila cha muku’lu’yo aho ki’lav’e chamala. 45 Aho ki’sila cha muku’lu’yo ki’lav’e chamala, alalav’i’le ago wamuv’ezezizye. Haho ndatu’me muntu' aku’londe ki’gele u’su’v’e. Ku' ki' nfwi’lwe na inywe v’ose v’av’i’li' ku' lu’siku' lu’mo?"

46 Haho Lebeka wamuwi’laga Isaka ati', "Ene ni’na wikalo wu’v’i mu moyo gwanne ku’nguno ya av’a v’aki’ma v’a Ki’hiti v’aki' v’amwa Esau. U’lu' na Yakobo atoole ku' v’enav’a V’ahiti, wikalo wanne wu’lav’e na wu’soga ki'?"