Gênesis 29

Yakobo ali’fika ku' Padani-alamu

1 Hohene Yakobo wendeleyaga na musi’nzo gwakwe, na wafikaga ku' nsi' zya v’antu' v’a mu ki’ya. 2 Aho wafikaga kwenu’ko, wawonaga madale adatu' ga nkolo na mbu’li galalile mu mbu’ga. Kasinaga, henanho ku’li' na lwinzi', na nkolo na mbu’li zyeni’zyo zyav’age zilindi’lile ku’nywisiwa minzi' ku’fuma mu lwinzi' lwenu’lo, u’lo lwav’age lu’kundi’ki’lilwe na iwe ihanya. 3 Ki’ti’le cha ki’la lu’siku' chav’age i’vi: Itungo madale ga nkolo na mbu’li aho gav’age u’lu' gikuminga henanho, hu' hene v’adi’mi v’apiliminsyage iwe lyeni’lo ku’fuma ha lwinzi', ki’gele v’azinywisye. U’lu' v’amali’la ku’nywisya v’ali’su’v’yage iwe lyeni’lo ha igu’lya na lwinzi'.

4 Yakobo wav’awu’zyaga v’adi’mi ati', "V’adu’gu' v’anne mufumi’i’lile ku’he?" Nav’o v’asu’v’yaga, "Ku’fumi’i’lile ku' Halani." 5 Wav’awu’zyaga hangi', "Vihe, mumumanyile Labani, mwizu’ku’lu' wamwa Naholi?" Nav’o v’asu’v’yaga ati', "Ku’mumanyile". 6 Hangi' wav’awu’zyaga, "Vihe, mupanga?" Nav’o v’asu’v’yaga ati', "Ali' mupanga. Lingaga, Lahele u’yo izile na nkolo na mbu’li hu' mwaniki' wakwe." 7 Haho Yakobo wav’awi’laga ati', "Lingaga, lyu’v’a li’kaali' isewu na itungo lya ku’kuminga mitugo li’kaali' ku’fika. Gi’si' munywisye mitugo, na muzisu’v’ye ku' idi’ma." 8 Ali’vi v’adi’mi v’enav’o v’asu’v’yaga ati', "Ku’kakowolile ku’nywisya, mpaka madale gose gikuminge haki’mo. Haho ku’ku’li’piliminsya iwe ku’fuma ha lwinzi' na ku’zinywisya mitugo."

9 Aho Yakobo wav’age akaali' ali’su’nsu’mu’la na v’adi’mi v’enav’o, Lahele wafikaga na nkolo na mbu’li zyamwa ise, ku’nguno hu' u’yo wav’age mudi’mi wa mitugo. 10 Yav’aga aho Yakobo wamuwonaga Lahele, mwaniki' wamwa mamiye Labani, haki’mo na nkolo na mbu’li zyamwa Labani, wangu’haga ku’ya ku' lwinzi', wapiliminsyaga iwe lyeni’lo ku’fuma ha igu’lya na lwinzi', na ku’zinywisya mitugo zyamwa mamiye. 11 Hangi' Yakobo wamusu’naga Lahele na ku’li’la ku' wu’togwe, 12 na wamuwi’laga ati', "Ene ni' mudu’gu' wamwa so, ni' mwana wamwa Lebeka!" Haho Lahele wapeelaga ku’ya ku' lu’go na ku’muwi’la ise mmola yamwa Yakobo.

13 Yav’aga aho Labani wigagwa mmola yamwa Yakobo, mwana wamwa ilu’mbu’ye, wayaga lu’v’i’lo ku’kamusu’mbi’la. Aho wafikaga wamuwungati’laga na ku’musu’na, wamuletaga mu lu’go lwakwe. Haho Yakobo wamuwi’laga Labani magambo gose. 14 Nawe Labani wasu’v’yaga ati', "Nhana ev’e u’li' mudu’gu' wanne na u’li' magazi ganne!" Hohene Yakobo wikalaga hamwa Labani mwezi gu’mo.

Yakobo ali’v’atoola Leya na Lahele

15 Lu’siku' lu’mo, Labani wamuwi’laga Yakobo ati', "Ev’e u’li' mudu’gu' wanne. Ali’vi yi’kav’ile visoga ku’v’a u’ntu’mami’le mili’mo gele. U’mbwi’le u’li’koov’a nku’li’pe lu’v’alo ki'?" 16 Itungo lyeni’lo Labani wasangwa ali' na v’aniki' v’av’i’li'. Muhanya witanagwe Leya, na mudo witanagwe Lahele.

17 Leya wav’age na minso makondu, ali’vi Lahele wav’age mwaniki' mugololoku, ali' na wisuki’lo. 18 Yakobo wav’age amutogilwe Lahele, haho wamuwi’laga Labani ati', "Nku’ku’tu’mami’la mili’mo mu itungo lya myaka mupungati', nanho u’ku’mpa Lahele u’yo mwaniki' wako mudo ki’gele mmutoole." 19 Labani wayombaga ati', "Yi’li' visoga nku’tozye ev’e, ku’ki’la ku’mupa muntu' yu’ngi'. Ev’e ikalaga ha wanne."

20 Hohene Yakobo wamutu’mami’laga mili’mo Labani mu itungo lya myaka mupungati', ki’gele amutoole Lahele. Ali’vi myaka mupungati' zyeni’zyo, Yakobo waziwonaga ki’ti' nsiku' ndoo du’hu', ku’nguno wav’age amutogilwe muno Lahele.

21 Aho Yakobo wamalaga itungo lyeni’lo, wamuwi’laga Labani ati', "Nagelani’zyaga myaka yanne ya ku’ku’tu’mami’la mili’mo. Ku’nguno yeni’yo, mpage muki' wanne, ki’gele mmutoole." 22 Hohene Labani wav’ilingaga v’antu' v’ose v’a henanho, na wav’ezyaga mwanya gwa viliwa na vinywiwa vingi.

23 Ali’vi aho lyafikaga itungo lya mpi’ndi', Labani wamusolaga Leya mwana wakwe muhanya, wamufili’laga Yakobo, nawe Yakobo walalaga nawe. 24 Labani ndi' wasangwa wamupa Leya muzya wakwe Zilipa, ki’gele av’e muzya wamwa Leya. 25 Wangalu’ke ndiyu' Yakobo wamanyaga ku’v’a kasinaga wapiv’agwa Leya! Akav’ile Lahele, hohene Yakobo wayaga ku’kamuwu’zya Labani ati', "Wambezezyaga igambo ki'? Naku’tu’mami’lile mili’mo ki’gele mmutoole Lahele, gi’si' ku’nguno wankonga?" 26 Labani wasu’v’yaga ati', "Ku’no ku' wiswe yi’kav’ile ki’ti’lwe ku’mutozya mwaniki' mudo, u’lu' muku’lu’ye akaali' ku’toolwa. 27 Gi’si' u’v’ezye i’vi: U’male nsiku' mupungati' zya wi’nga wamwa Leya, haho nku’ku’pa na Lahele. Ali’vi u’ku’ntu’mami’la hangi' ku' itungo lya myaka mupungati' zingi'."

28 Hohene Yakobo wazumyaga. Wamalaga nsiku' mupungati' zya wi’nga wamwa Leya, nawe Labani wamupaga Lahele nawe av’e muki' wakwe. 29 Labani wamufumyaga Biliha muzya wakwe, wamupaga Lahele ki’gele av’e muzya wakwe. 30 Hohene Yakobo walalaga na Lahele hangi'. Ali’vi wav’age amutogilwe Lahele ku’ki’la Leya. Yakobo wamutu’mami’laga Labani ku' itungo lya myaka mupungati' zingi'.

V’ana wamwa Yakobo

31 Aho Gu’ku' Mulungu wawonaga ku’v’a Leya akav’ile mutoneke, haho wamupaga wu’v’yazi, sumbwa Lahele wav’aga mugu’mba. 32 Leya wapandi’kaga mwitungo, nawe wav’yalaga mwana wa ki’gosya, wayombaga ati', "Gu’ku' Mulungu wawonaga lu’duko lwanne, gi’si' mugosi wanne aku’ntogwa." Ku’nguno yeni’yo wamupaga lina Lubeni*29:32 Lina "Lubeni" ku' Ki’ebulania likolile na muhayo "Lingaga, mwana wa ki’gosya.". 33 Leya wapandi’kaga hangi' mwitungo, wav’yalaga mwana wa ki’gosya, wayombaga ati', "Gu’ku' Mulungu wampaga hangi' mwana wa ki’gosya, ku’nguno wigagwa ku’v’a nkav’ile mutoneke." Ku’nguno yeni’yo wamupaga lina lyakwe Simiyoni*29:33 Lina "Simiyoni" ku' Ki’ebulania likolile na muhayo "kwigwa.". 34 Wapandi’kaga hangi' mwitungo, nawe wav’yalaga mwana wa ki’gosya, wayombaga ati', "Itungo lyeni’li', mugosi wanne aku’v’a haki’mo nanne ku’nguno namuv’yali’laga v’ana v’adatu' v’a ki’gosya." Ku’nguno yeni’yo wamupaga lina Lawi*29:34 Lina "Lawi" ku' Ki’ebulania likolile na muhayo "ku’lu’ngya.". 35 Wapandi’kaga hangi' mwitungo, wav’yalaga mwana wa ki’gosya, wayombaga ati', "Itungo lyeni’li' nu’mukumi’li’zya Gu’ku' Mulungu." Ku’nguno yeni’yo, wamupaga lina Yuda*29:35 Lina "Yuda" ku' Ki’ebulania likolile na muhayo "aku’kumi’li’ziwa.". Nawe walekaga ku’v’yala.