1 ହେ ନାଜିଂ ସାତ୍‌ ଜାଣ୍‌ କଗ୍‌ଲେକ୍‌ ର ଆଣ୍ଡ୍ରେନ୍‌ତିଂ ଆସ୍ତି ଇନିକ୍‌, "ଆପେଙ୍ଗ୍‌ ନିଜେ କାଦି ତିନାପ୍‌ ଆରି ଜାର୍‌ତି ହେନ୍ଦ୍ରା ଉସ୍ପାନାପ୍‌; କେବଲ୍‌ ନି ତର୍‌ଦ ଆପେଙ୍ଗ୍‌ ଡାକ୍‌ପୁଟା ଆନାପ୍‌; ଏନ୍‌ ମା ଅପ୍‌ମାନ୍‌ ଦେହା କିଦାଟ୍‌ ।"

2 ହେ ନାଜିଂ ଇସ୍ରାଏଲ୍‌ ବିତ୍ରେ ବାଚାନି ମାନାୟାର୍‌ କାଜିଂ ନିତ୍ରେମାପ୍ରୁତି କେନ୍ଦା ହଲ୍‌ନାକା ଆରି ଗାଜା ଜାଜ୍‌ମାଲ୍‌ ଆନାତ୍‌, ଆରେ ଦେସ୍‌ନି ପାଡ଼୍‌ ହାର୍ଦାକା ଆରି ହଲ୍‌ନାତ୍‌ । 3 ଆରେ, ମାପ୍ରୁ ଏଚେକାଡ଼୍‌ଦ ବିଚାର୍‌କାରିୟା ଜିବୁନ୍‌ ଆରି କାଡ଼୍‌ତି ଜିବୁନ୍‌ ହୁକେ ସିୟନ୍‌ନି ଗାଡ଼୍‌ଚେକ୍‌ ପିଙ୍ଗ୍ ନୁସ୍‌ନିକ୍‌ ଆରି ଜିରୁସାଲମ୍‌ ବିତ୍ରେତାଂ ହେବେନି ପୁଇପୁୟା ନେତେର୍‌ ଦେହାକିନିକ୍‌; 4 ହେପାଦ୍‌ନା ସିୟନ୍‌ତ ଇନେର୍‌ ବାକି ମାନାର୍‌ ଆରି ଜିରୁସାଲମ୍‌ତ ମାନାର୍‌, ଇଚିସ୍‌, ଜିରୁସାଲମ୍‌ନି ବିଚାର୍ କିନି ଜିବୁନ୍‌ ମାନାୟାର୍‌ ବିତ୍ରେ ଜେ ଜାଣ୍‌କେତି ତର୍‌ ଲେକାନାତ୍‌, ମାପ୍ରୁ ପୁଇପୁୟା ଆହ୍‌ନି ଜିବୁନ୍‌ ଇଞ୍ଜି ଡାକ୍‌ପୁଟା ଆନାନ୍‌ । 5 ଆରେ, ନିତ୍ରେମାପ୍ରୁ ସିୟନ୍‌ ମାଡ଼ିତ ସବୁ ଇଲ୍‌କୁ ଆରି ତା ସବୁ ମାନ୍‌ଜାଲ୍‌ୟା ଜପି ୱେଡ଼ାଲିଂ ବାଦାଡ଼୍‌ ଆରି କଦା ଆରି ମ୍ଡିକାଲିଂ ଆହ୍‌ନି ନାଣି ଜେଞ୍ଜେନାକା ଉବ୍‌ଜା ଆନାତ୍‌; ଇନେକିଦେଂକି ସବୁ ସାକ୍ତି ଜପି ଲେଞ୍ଜ୍‌ ଅଜଡ଼୍‌ ମେଙ୍ଗ୍‌ନାତ୍‌ । 6 ଆରେ, ୱେଡ଼ାଲିଂ କାରାନି ହିତ୍‌ଡ଼ି ରାକ୍ୟାନି କାଜିଂ, ଆରେ ଦୁକାବାର୍ହା ଆରି ବାର୍ହାତାଂରାକ୍ୟାନି କାଜିଂ ର ଆହ୍‌ର ଇଲ୍‌ ଆନାତ୍‌ ।