1 Kwandaga na mnt'hu yumwenga mwe isi ya Usi zina dyakwe etangagwa Ayubu. Mnt'hu uyo andaga ywedi naho mhuwila, andaga akamvika Mnungu naho haungaga kudamanya yaihle. 2 Ayubu andaga na wana kilume mfungate na wanakike watatu, 3 naho andaga na ngoto alufu mfungate na ngamia alufu nt'hatu na ng'ombe alufu imwenga zo kulima na mp'hunda magana mashano naho andaga na wandima wabindile wingi, yehe andaga mgoli mkulu vitendese kujink'ha want'hu wose uko ulailo wa zuwa.

4 Wanawe wandaga na kihendo cha kulalikana cho kudya na kunywa mwe zinyumba zawe kila yumwenga kwa zuwa dyakwe, wandaga wakawawalalika walumbu zawe watatu vileke weze wadye no kunywa hamwenga nawo. 5 Kila wakabinda zuwa dya kinyemi, Ayubu awetangaga wanawe vileke awakukize. Enukaga mtondo tondo umwo zuwa dya kinyemi dize disile, alavaga nt'hambiko yo kokwa kwajili ya kila yumwenga wawe kwaviya afanyanyaga kugamba vadahika wanangu wadamanyaga wavu naho wafanyanyaga yaihile mwa Mnungu mwe mioyo yawe. Ino Yandaga ni kihendo kwa Ayubu.

6 Zuwa dimwenga watumigwa wa kwe mbingu waduganaga ho undiilo wa Zumbe Mnungu. Mwavu naye ezaga niyo anda hamwenga nawo. 7 Zumbe Mnungu amuuzaga Mwavu, "Walawahi?"

Mwavu naye niyo amhitula, "Nalawa mwo kugenda genda na kuzungulukazunguluka mwe isi."

8 Zumbe Mnungu niyo amgamba Mwavu, "Togola kumwona mndima ywangu Ayubu? Mwe isi yose hahana mtuhu eli enga yehe. Yehe ni mnt'hu ywedi akunivika miye naho hakuunga kudamanya yaihile."

9 Mwavu niyo amhitula Zumbe Mnungu, "Togola Ayubu akuvika weye haheina kint'hu? 10 Weye kumwamila nt'hendelo zose yehe hamwenga na nyumba yakwe na kila kint'hu icho ananacho, kumvikila ugoli wakwe ugenyela mwe isi yose. 11 Mna haluse mhoke vint'hu vose ivo ananavo, uone uneva hakuhomole mwe kiyeti!"

12 Zumbe Mnungu niyo amgamba mwavu, "Aya wadaha kudamanya chochose icho ukudaha mwa uwo ugoli wakwe mna yehe mwenye usekumlumiza." Ivo Mwavu ahalawaga ho undiilo wa Zumbe Mnungu.

13 Zuwa dimwenga wana wa Ayubu umwo wandaga wakadya no kunywa divai mwe nyumba ya nduguye mkulu, 14 mndima ywakwe yumwenga ezaga kwa Ayubu akaguluka na kumgamba, "Chandaga kikalima kwa ng'ombe, mp'hunda zako nazo zandaga aho hagihi zikadya. 15 Aaho Waseba wawatowaga na kuiguha mifugwa na kuwakoma wandima kwa sime. Hihona miye nikedu hiza kukwigaila ulosi." 16 Umwo akanda agendeela kulonga, mwigala ulosi mtuhu ezaga niyo agamba, "Lumwemwe lwaseelaga kulawa kwo ulanga niyo woka ngoto na wadimi, ni miye nikedu nihonile kukwigaila ulosi."

17 Uyo naye umwo akanda akagendeela kulonga, mwigala ulosi mtuhu naye ezaga niyo agamba, "Mafyo matatu ya Wakalidayo yakikump'hukilaga na kuzitaha zingamia zako. Naho wawakomaga wadimi wako kwa sime. Ni miye nikedu nihonile kukwigaila ulosi!"

18 Umwo akanda akei kubinda kulonga, ezaga mwigala ulosi mtuhu naho niyo agamba, "Wana wako wose we kilume na wanakike wandaga wakadya no kunywa mwe nyumba ya nduguye yawe mkulu, 19 aaho niyo kwalaila nk'hung'unt'ho kulawa kwe dijangwa, yaitowaga nyumba iyo mwe mp'hembe nne niyo yagwa, naho wana wose wabanikaga, ni miye nikedu nihonile kukwigaila ulosi."

20 Aho Ayubu niyo akimala, atatulaga mavalo yakwe na kuzimoga fili zakwe, niyo akeduula hasi na kumvika Zumbe Mnungu. 21 Niyo agamba, "Nelekagwa hina kint'hu name nenihauke hina kint'hu, Zumbe Mnungu anink'haga naho kaviguha, zina dyakwe ditogolwe!"

22 Mwe mbuli izi zose Ayubu hadamanye wavu naho hafanyanye kugamba Mnungu kamdamanyila yaihile.