1 Ayubu niyo amhitula, 2 togola nii mwagendeela kunisulumiza kwa milosi yenyu?

3 Nk'hanana zose izi mnilonga vihile,

Togola hamkuona soni kunitendela vihile?

4 Hata uneva kindedi hidamanya vihile,

togoleni ayo yawalumizani vivihi.

5 Togoleni mwafanyanya kugamba nyuwe ni wedi kujink'ha miye,

na kutenda masulumizo yangu kunda ukindedi wa malema yangu.

6 Togoleni nyuwe hamkuona kugamba Mnungu niye anidamanyile aya,

yehe kaika mtego vileke anigwile.

7 Uneva haila nambizeni ni mwe masulumizo,

mna hekuli akunitegeleza,

hekuli akwiza kunink'ha uwagilwa wangu.

8 Mnungu kaikindila sila yangu vileke nisekomboka,

kazigela ziza sila zangu.

9 Kahausa ugoli wangu,

na kuibanaga nt'hogola yangu.

10 Kanitowa nt'hendelo zose name hisila,

kading'ola kawiilo dyangu.

na kunileka ninyuluke na kubanika

11 Yehe kaniihiya vitendese,

kaniona kunda enga mnk'hondo wakwe.

12 Kadisigiila fyo dyakwe dya watowani na kunikump'hukila,

naho wasimba mabome kuzunguluka kaya yangu.

13 Mnungu kaitenda mp'huga yangu inileke,

miye hinda mta kwiza kwa wadya wakunimanya.

14 Wandugu zangu na wambwiya zangu hawakunambiza naho.

15 Watakwiza mwe nyumba yangu wanijala,

wandima wangu wa kivele waniona enga mtakwiza,

16 Umwo hamwitanga mndima ywangu hakuniitika,

hata nnamlombeza wambizi hakunihitula.

17 Muye wangu wamnunk'hila mkazangu,

naho wandugu zangu hawakudaha kunizila hagihi.

18 Hata wana wadodo wanibela na kuniseka umwo wananiona.

19 Wambuya zangu wakulu waihizwa na miye,

wadya wendile wakaniunga wanihituka.

20 Mwili wangu usigala mavuha na nk'handa du,

nehisigala hadodo nibanike.

21 Nioneleni mbazi, nioneleni mbazi nyuwe wambuya zangu,

kwaviya Mnungu kanitenda nisulumile ivi.

22 Kwaajili yani mwanisulumiza enga ivo akunisulumiza Mnungu?

Togoleni, masulumizo ayo mnitendele hayakukint'ha?

23 Nevinda vedi mbuli yanyu yawandikwe

naho uwandikwa mwe kitabu!

24 Nevinda vedi mbuli zangu zasongolwe kwa nt'hema mwe luwe,

hegu yawandikwe vileke yasigale mazuwa yose.

25 Namanya kugamba mgombezi wangu mgima,

naho namanya kugamba uheelo mwa aya naakimale mwe isi anigombele.

26 Hamwenga na kugamba nk'handa yangu ibanangwa ivi,

umwo handa nikei no mwili uno nenimuone Mnungu.

27 Miye nenimuone kwa meso yangu mwenye,

na miye nenimmanye,

Naho mwo moyo wangu nna nk'hwina ya kumuwona.

28 "Nyuwe mwadaha kugamba nekigendeele vivihi kumsulumiza?"

Nyuwe mwazungula kint'hu cha kunisulumiza.

29 Vituhu vakwe nyuwe wenye mwaungwa kogoha usengelo,

Mnungu akamuihiya mnt'hu amsengela,

na kumsengela mnt'hu uyo naho nommanye kugamba ni yehe asengele want'hu.