1 Ayubu niyo ahitula.

2 Hata haluse nikei nagendeela kulabila kwa usungu, hata hikudaha kuleka kusulumila.

3 Hegu nevinda vedi nehamanya hant'hu aho eli Mnungu,

nehadaha kuita hata hagihi naye.

4 Nehayalongeleza aya yose ho undiilo wakwe,

na kumwigaila malongelezo yangu yose ye mwe moyo wangu.

5 Nehaunga nimanye icho hegu alongile,

na ivo naakaunga anihitule.

6 Togola Mnungu naahigane na miye kwa udahi wakwe wose?

Bule, yehe hegu nakanitegeleza.

7 Yehe adaha kulonga na mnt'hu mhuwilwa,

Mnungu niye mlamuzi wangu hegu nakalamula kugamba, hina masa ulo na ulo.

8 Kaula, naita ulailo wa zuwa mna Mnungu himuone uko,

nize nimzungule usweelo wa zuwa uko nako himuone.

9 Umwo hamzungula nt'hendelo ya kasikazini hikumuona,

mna nnahituka nt'hendelo ya kusini hikumuona.

10 Mna yehe kaimanya kila nk'hacho hugenda,

naho akabinda kunigeza, neninde ywedi enga zahabu.

11 Natimila lugendo lwakwe kwa uhuwila,

sila zakwe hizitozeleza haheina kuhituka.

12 Mazuwa yose natimila sigilizi za Mnungu,

natimila ivo akuunga yehe, naho hiyo yadya huunga miye.

13 Yehe hakuhituka naho hahali akudaha kumhinga,

hegu kumkindila kudamanya kiya akuunga.

14 Yehe naakint'hize kiya aungile kudamanya kwangu,

na idyo ni dimwenga mwe vingi ananavo mwangu.

15 Ivo nazingiza kwa wogohi hameso hakwe, hata nnafanyanya du napata kizingizo.

16 Mnungu kautenda moyo wangu usokele, na Zumbe Mnungu kanigela wogofi

17 Kwaviya higubikwa na ziza,

hata diziza dititihale digubika futa yangu.