1 Hayafanyanya ayo,

moyo wangu wazingiza kwa wogohi.

2 Nyuwe nyose tegelezeni izwi dya Mnungu,

tegelezeni izwi enga lukuwa lukulawa mwo mnomo wakwe.

3 Yehe aleta lumwemwe mwo ulanga wose,

naho lumwemwe lwakwe wenela mwe zint'hendelo zose ze isi.

4 Akajika izwi dyakwe dyevika,

izwi kulu dya lukuwa,

mwo lupisi lwose umwo anatint'hila lumwemwe lwa mweka.

5 Umwo Mnungu anatint'hila mbuli nk'hulu zalaila,

mbuli za kwehela izo suwe hakikudaha kuzikombaganya.

6 Aigambila balafu, igwe mwe isi,

nakuyagambila mant'hwent'he ye fula yanye,

7 Akimalisa ndima zose za kila mnt'hu,

vileke want'hu wose wamanye ndima zakwe.

8 Makala ya kwe mbago nayo,

yauya mwe zimp'hanga zawe.

9 Nk'hung'unt'ho yalawaga mwe chumba chakwe,

naho mp'heho yalawa mwe digulu dyakwe.

10 Kwa muye ywa Mnungu mazi yanda ya balafu,

yahituka na kunda yatogile

11 Ayamemeza mazi mwa mavunde, lumwemwe lwamweka kulawa mwe mavunde ayo,

12 yakagenda enga ivo akuunga Mnungu,

kulanga ye isi yose,

na kudamanya dyodyose idyo akusigiila.

13 Mnungu ailagiza fula inye mwe isi,

naho adaha kuisigiila ikisengele,

hegu kulagisa lukunde lwakwe.

14 Ayubu hake goja naho utegeleze,

fanyanya mbuli za kwehela izo akudamanya Mnungu.

15 Togola wamanya ivo Mnungu akulava sigilizi yakwe?

na kulutenda lumwemwe mwe mwavunde?

16 Togola wamanya ivo mavunde yakuyeya kulanga?

Izo nizo ndima zedi za kwehela za Mnungu.

17 Weye wahumwa ni fukuto itendese mwe zisuke zako,

aho isi yanyamalaga haheina mp'heho ya kusini.

18 Togola, wadaha kuzeneza mbingu hamwenga naye,

na kuzitenda zitoga enga kilama kisanigwe?

19 Ayubu, kihinize cha kumgambila Mnungu,

fanyanyi zetu hazina kint'hu, naho hakina dyo kulonga.

20 Miye hikugeza kulonga na Mnungu,

nnatenda ivo nazungula kubanika.

21 Ivo hahana akudaha kudikaula zuwa,

kwaivo dikung'ala kulanga,

mp'heho ihagila ulanga.

22 Ung'azi wedi walaila kasikazini,

Mnungu kagubikwa no ukulu wa kutisa.

23 Mnungu mta udahi hakikudaha kumsogeela,

Mnungu ni mta uwagilwa naho mhuwilwa mwe zindima zakwe.

24 Kwa ivo want'hu wose wamwogoha,

kwaviya yehe hakumkaula mnt'hu yeyose mta moyo mdala.