1 Niho Elihu agendeelaga kulonga. 2 Nyuwe want'hu mna mizungu na ubala utendese,

haluse nitegelezeni kiya hulonga.

3 Nyuwe mwamanya nk'hande yedi umwo mkaluma,

mna hamkuimanya milosi ya mzungu umwo mkaitegeleza.

4 Ivo kisagule mbule yedi,

naho kilamule mwetu mbuli iyedi.

5 Ayubu agambaga, miye hina masa,

mna Mnungu kanihausila uwagilwa wangu.

6 Ayubu niyo agamba miye hina masa mna woho wagamba ni mdant'hi,

hilumizwa vitendese mna hina wavu.

7 Togoleni nyuwe mwamuonaga mnt'hu enga Ayubu,

yehe hakumtunya Mnungu vitendese?

8 Yehe anda hamwenga na want'hu waihile,

na kunda na umbuya na wata wavu.

9 Kwaviya agamba, mnt'hu hakupata kint'hu chochose,

umwo anakombeka kumwelela Mnungu.

10 Kwaivo tegelezeni nyuwe wata umanyi,

Mnungu hakudaha kudamanya uwihi, Mnungu mta udahi hakudaha kunda na lema.

11 Mnungu naamlihe mnt'hu kuligana na udamanyi wakwe,

naye naadamanye kwa kila mnt'hu kuligana na sila zakwe.

12 Ni kindedi kugamba Mnungu hakudamanya uwihi,

Mnungu mta udahi hakuzaganya uwagilwa.

13 Niani amsigiile kuikaula isi?

Mnungu mwenye niye akuikaula isi yose.

14 Uneva Mnungu anamtenda mnt'hu asekuhema, akahause muye wakwe wo ugima mwe isi.

15 viumbwa vose nevibanangwa,

na kuuya mwo luvumbi.

16 Uneva una ubala, haluse nitegeleze kiya hukugambiala.

17 Togola weye wamsengela Mnungu mta uwagilwa?

Hegu weye wadaha kufanyanya kugamba Mnungu aihiwa no uwagilwa?

18 Mnungu awasengela maseuta na wata udahi,

umwo wakadamanya uhezi hegu wavu.

19 Yehe hakuwaambiza zagula wakulu umwo wakabananga,

hegu kuwaungisa wagoli kujink'ha wakiwa,

kwaviya wose awo ni ndima ye mikono yakwe.

20 Chadaha kubanika kipump'ha nekilo,

Mungu adaha kukitowa na kukikoma pele,

awakoma wata ludole na heweena udahi wowose.

21 Mnungu aona ivo kikwikala, naho aona udamanyi wawe wose.

22 Want'hu wakudamanya uwihi hawakudaha kukefisa ha Mnungu,

hahana hant'hu heli ziza dititihale dya kuwafisa.

23 Mnungu hakumgambila mnt'hu yeyose

kugamba niini namsengele.

24 Yehe awahausa vilongozi haheina kuwapelemba,

na kuwaika watuhu hant'hu hawe.

25 Kwaviya amanya udamanyi wawe wose,

awahausa nekilo nawo na kuwabananga.

26 Yehe awasengeela waihi mwe hekieti kwajili yo uwihi wawe.

27 Kwaviya waleka kumtimila yehe,

na kuzibela sigilizi zakwe zose.

28 Awo niyo watendile ndilo ya wakiwa ibule kwa Mnungu kailombeza wambizi,

ivo Mnungu evaga ndilo yawe awo wasulumizwe.

29 Uneva Mnungu ananyamala ni ani akudaha kumlabila?

Uneva anakefisa futa yakwe niani akudaha kumuona.

30 Haihali isi ikudaha kudamanya,

vileke kumkindila mnt'hu mwihi asekulongoza.

31 Togola weye Ayubu kukeiila wavu wako kwa Mnungu,

na kuika ndagano kugamba houdamanye naho.

32 Mnungu nilagise masa ayo hikudaha kuyaona

Uneva hidamanya masa heniwiiye naho.

33 Kwaviya wahiga kiya Mnungu akudamanya,

togola wadaha kufanyanya kugamba wadaha kudamanya icho ukuunga?

ulamuzi ni wako naho hiyo wangu

kigambile haluse icho ukufanyanya.

34 Mnt'hu yeyose mta umanyi nanizumile miye,

na mnt'hu mta umanyi naanitegeleze kiya hulonga.

35 Kugamba Ayubu alonga haheina umanyi,

mbuli izo akulonga hazina mzungu.

36 Uneva unafanyanya kila kint'hu akulonga Ayubu,

noubunk'hule kugamba alonga enga mnt'hu mwavu.

37 Mwo wavu wakwe kongezela kusaguka,

na kulongole kwetu wagendeela kumbela Mnungu.