1 Niyo Ayubu akonga kulonga naho,

2 Nandile enga ivo nandaga aho kale,

mwo lupisi umwo Mnungu andaga akanamila.

3 Umwo Mnungu andaga na miye,

andaga akanilangazila umwo hagenda mwe diziza.

4 Ayo nayo mazuwa nandaga mpati,

Mnungu andaga mbuyangu naye amilaga nyumba yangu.

5 Zumbe Mnungu andaga hamwenga na miye,

naho wanangu wandaga hagihi na miye.

6 Ng'ombe ne zimbuzi zangu zalavaga mele nyingi,

na miti yangu ya mizaituni yelekaga vedi mwo ulongo wa maiwe.

7 Umwo wadala wo mzi weze wabwilane kwe nk'hili yo mzi,

name nandanga hamwenga nawo.

8 wabwanga weze wanione wakimalaga hank'handa,

nawo wadala wekalaga wakimalaga wanilamse.

9 Vilongozi wa want'hu weze wanione wanyamalaga.

10 Na wakulu wakumanyika walekaga kulonga.

11 Kila uyo anione na kwiva mbuli zangu,

andaga na mbuli zedi za kulonga mwa yadya nidamanye.

12 Kwaviya mkiwa eze aile namwambizaga,

na mwana nk'hiwa heena ha kuita namwambizaga.

13 Mnt'hu endile hagihi no kubanika anitogolaga,

nakuwatenda wadya wefilwe ni wagosi zawe waone kinyemi umwo nawaambizaga.

14 Mazuwa yose nadamanya yadya yakuungwa,

naho ni enga suke zangu huvala

15 Nandaga meso kwa mant'hunt'hu kwa kuwalongoza,

na kwa waholomp'hale nandaga mwambizi ywawe.

16 Kwa wakiwa nandaga tati yawe,

nakombekaga kuwagombela want'hu hiwamanyize.

17 Nabanangaga ludole lwa want'hu waihi,

na kuwayokola wahujilwe ni wata ludole.

18 Nk'hanana zose nafanyanyaga kugamba nenikale mazuwa mengi,

na kubanika mwe kaya yangu haheina masulumizo.

19 Nandaga enga mti uwo maizwi yakwe yakanda mwe mazi,

na matambi yakwe yajabala mnyuzu.

20 Kila mnt'hu anitogolaga,

na ludole lwangu halunihungukile.

21 Umwo nalavaga ulangilizi, want'hu wanyamalaga,

na kutegelezesa yadya nalongile.

22 Umwo nize nibinde kulonga wandaga hawana cho kongezela,

wevaga kila mbuli na kuifanyanya.

23 Kila yumwenga ahokelaga ulosi wangu,

enga mnimi akukawiila fula mwo lupisi lwa vuli.

24 Weze wafe chevu nawalagisaga kinyemi,

na futa yangu ye kinyemi yawasangalazaga.

25 Naguhaga ulongozi wa kudamanya ulamuzi mwawe,

nawalongozaga enga seuta ivo akulongoza fyo dya watowani wakwe,

na kuwasangalaza want'hu wafile chevu.