1 Niho Sofali mbwiya ywa Ayubu alaile Naamati amhitulaga Ayubu,

2 Togola kulonga milosi mingi yakutenda unde no uwagilwa?

3 Togola nigendeele kunyamala umwo ukalonga mbuli zako ze kihezi?

Hegu kisekukufank'hila umwo ukambela Mnungu?

4 Wamgambila Mnungu kugamba mahinizo yangu ni ya kindedi,

name ni ywedi hameso hako.

5 Naungisa Mnungu akuhitule!

6 Na yehe akugubuile kinyele cho mzungu,

kwaviya umanyi we kindedi hiyo mhufu kuumanya,

mna umanye kugamba Mnungu hakuwaza masa yako yose.

7 Togola wadaha kumanya kinyele cha Mnungu?

Hegu wadaha kupelemba mbuli za Mnungu?

8 Ukulu wakwe Mnungu u kulanga kujink'ha mbingu,

naho hukudaha kudamanya chochose mwa idyo?

Uzangalamu wakwe wajink'ha mnyongomela,

mna weye hukumanya?

9 Ukulu wa Mnungu ni mkulu kujink'ha isi,

uzangalamu wakwe wajink'ha bahali.

10 Mnungu adaha kukugwila na kukugela mwe magezo,

niani akudaha kumkindila?

11 Mnungu kawamanya want'hu heweena uwagilwa,

naho aona udamanyi wawe wihile.

12 Mhezi hakudaha kunda na umanyi,

hegu viya mp'hunda heikudaha kweleka mnt'hu.

13 Ayubu keiile kwa Mnungu ukazungula wambizi wakwe.

14 Uneva kuna wavu mwe nyumba yako uleke.

15 Aho, nouwakaule want'hu haheina soni,

noukimale haheina kogoha.

16 Noujale makunt'ho yako yose,

neinde enga lawo dyomboke, houkumbukile naho.

17 Wikazi wako naung'ale kujink'ha zuwa dya nomsi,

ziza dyakwe nedihituke kunda ungazi wa mtondo tondo.

18 Nounde hant'hu hatondowale kwaviya una kawiilo,

Mnungu naakwamile na kukuhumuza.

19 Naugone haheina kutiswa ni mnt'hu,

want'hu wengi naweze kukulombeza wambizi.

20 Mna meso ya waihi hayaone,

sila zawe zose za kunyilikila nezage,

kawiilo dyawe dyo uheelo ni kubanika.