1 Zuwa tuhu naho, watumigwa ywa kwe mbingu weze wadugane ho undiilo wa Zumbe Mnungu, Mwavu naye alailaga aaho hameso hawe. 2 Zumbe Mnungu amuuzaga Mwavu, "Walawahi?"

Mwavu niyo amhitula, "Nalawa mwo kugendagenda na kuzungulukazunguluka mwe isi."

3 Zumbe Mnungu niyo amuuza Mwavu, "Togola kumwona mndima ywangu Ayubu? Hahana hata yumwenga mwe isi eli enga yehe. Yehe ni mnt'hu mhuwila naho ni ywedi. Anivika miye naho hakuunga kudamanya yaihile. Naye mpaka ivi haluse kanda mhuwila mna weye kuniluvya nimtendele yaihile haheina masa yeyose."

4 Mwavu niyo amhitula, "Kwafya umwili wakwe! Kwaviya mnt'hu naalave kila kint'hu icho ananacho kwajili yo ugima wakwe. 5 Haluse mtende ande na usungu mkulu mwo mwili wakwe, naye kwa kindedi naakuhomole!"

6 Ivo Zumbe Mnungu amgambaga Mwavu, "Haya, wadaha kumdamanyila vovose ivo ukuunga, mna usekumkoma."

7 Ivo Mwavu ahalawaga hameso ha Zumbe Mnungu, naye amsulumizaga Ayubu kwa kumwink'ha maihu yaihile yatumbukaga niyo yanda nk'wenge mwo mwili wakwe wose. 8 Niho Ayubu aguhaga kazae na kukekuluguta mwo mwili wakwe wose uku akanda kekala mwe maivu.

9 Aaho mkaziwe niyo amgamba, "Togola ukei du wamhuwila Mnungu ywako? Mhomole Mnungu vileke ubanike!"

10 Ayubu niyo amhitula mkaziwe, "Weye walonga enga yumwenga mwa awo wavele wahezi. Togola waunga kipate ayedi du kulawa kwa Mnungu? Kwajili yani kilemele kuhokela yaihile kulawa kwakwe?" Mwe mbuli izo zose Ayubu hadamanyaga wavu kwa kulonga kwakwe.

11 Ivo wambuyaze watatu Ayubu, Elifazi kulawa isi ya Temani na Bilidadi kulawa isi ya Shua na Sofali kulawa isi ya Naamati, wevaga mbuli ziihile mwa ayo yose yampatile Ayubu, wezaga vileke wamsangalaze mwa ayo makunt'ho apatile. 12 Umwo weze wamuone kwa hale wandaga hawammanyize kugamba ni yehe. Ivo weze wamuone kwa hagihi wakongaga kuila kwa kugutila naho watatulaga suke zawe na kutimula sanga kulanga na kukegela mwe mitwi yawe. 13 Ivo wekalaga hasi hamwenga na Ayubu kwa mazuwa mfungate kilo no msi, haheina kumgambila mbuli yeyose kwaviya waonaga masulumizo yakwe yandaga ni makulu vitendese.