1 Mnt'hu elekwe ni mvele,

mazuwa yakwe ni mageke ya kwikala naho yamema makunt'ho.

2 Abwailka enga mabwali,

anda enga kizuli kikomboka.

3 Togola nii wamkaulisa?

hegu noumwigale mwe kitala?

4 Niani akudaha kulava kint'hu chedi kulawa mwe kint'hu kisavu?

Hahana akudaha.

5 Mazuwa ya kwikala mnt'hu yawazika,

uwazilo wa miezi yakwe unanayo weye,

nawe kumuikila mihaka yakwe hekudaha komboka.

6 Kaula hale na yehe umleke,

mpaka akint'hize mazuwa yakwe enga mnt'hu akudamanya ndima ya maliho.

7 Kwaviya diyuko kawiilo kwa mti ukant'higwe, kugamba nousukile naho,

na masukiza yakwe nayagendeele.

8 Hata uneva maizi yakwe yadaha yaole mwo ulongo,

naho sina dyakwe nedifile mwo ulongo,

9 mna kwa kupata mazi nousukile,

noulave matambi enga mti ukuhotela.

10 Mna mnt'hu anabanika uwo nuwo uheelo wakwe,

muye unalawa naye haoneke naho?

11 Enga viya mazi yakunyala mwe bahali,

na mto ivo ukuleka kuseleza mazi,

12 nivo akubanika mnt'hu, haanuke naho,

mpaka umwo mbingu nezinde zihauka,

want'hu hawenuke hegu kwinulwa mwe zint'hongo zawe.

13 Nevinda vedi hegu unifisile ko mnyongomela

na lupisi udya uniiikile ukeza kusila na unikumbukile naho,

uneva kuniikila lupisi ulwo nounikumbukile.

14 Togola mnt'hu anabanika adaha kwikala naho?

mna miye nenigojele mpaka makunt'ho yangu yasile,

nenigojele kudamanywa uhya.

15 Aho nonitange name neniitike,

hegu naho nokaunga unione miye kwaviya weye mwenye niwe uniumbile.

16 Niho noudahe kuwaza lugendo lwangu,

mna houfanyanye wavu wangu.

17 Nounilekele malema yangu na kuyaika hale,

nawe nouhause uwihi wangu.

18 Mna enga viya mnima ukumoka,

na enga luwe ivo lukuhauswa hant'hu hakwe.

19 Enga mazi ivo yakuseela mwo mto yakuhausa maiwe,

na enga fula nk'hulu ikuhausa ulongo mwe isi,

nivo weye ukubananga kawiilo dya mnt'hu.

20 Weye wamhuma ludole nk'hanana imwenga du,

naye niyo ahauka ulo na ulo, wahitula futa yakwe na kumduila hale.

21 Wana wawe wakatunywa yehe hakumanya,

na wanabelwa yehe hakuona.

22 Huona usungu mwo mwili wakwe,

na kuhongeza kwajili yakwe mwenye.