1 Mna haluse, Ayubu tegeleza kwa wengele,

yose huunga nilonge.

2 Kwaviya haluse hikeika lumwe nilonge kiya ki mwo umanyi wangu.

3 Miye ni mnt'hu mhuwilwa ivo wadaha kuhuwila icho hulonga,

nohugambile kiya humanya kugamba ni kindedi.

4 Muye ywa Mnungu aniumbaga na muye wakwe wanink'ha ugima.

5 Ika lumwe milosi yako, naho unihitule uneva wadaha,

6 Miye na weye chaligana ha Mnungu,

miye na weye chaumbagwa kulawa mwo ulongo.

7 Kwaivo huna dya kukutenda unogohe,

henikuzamile kwa milosi yangu.

8 Haluse iki nicho nakiivaga ukalonga.

9 "Weye uywedi naho hudamanye diihile dyodyose,

na ni ywedi hwiina lema.

10 Iiviya iviya Mnungu kaunga du mwenye kunisengela,

na kunitenda enga mnk'hondo ywakwe.

11 Yehe avinyinya viga vangu kwa minyololo,

naho azikaula sila zangu zose kwa hagihi."

12 Mna miye nakugambila Ayubu, weye una malema,

kwaviya Mnungu ni mkulu kujink'ha want'hu.

13 Kwaajili yani wamlabila Mnungu,

nii ugambe Mnungu hakuhitula kulabila kwa want'hu?

14 Hamwenga na kugamba Mnungu alonga kwa sila zi hengi,

mna hehali akutimila yadya akalonga.

15 Mwo lupisi lwa nekilo want'hu wakagona nt'hongo zizamile

Mnungu alonga kwa sozi na maona.

16 Na kuwatenda wogohe,

kwa makanyo yakwe Mnungu,

17 Mnungu alonga nawo vileke wapate kuleka udamanyi wiihile,

na kuwayokola kulawa mwe kukeduvya.

18 Ivo awamila want'hu ne file,

vileke wanase kuita mwe kikuta.

19 Hegu Mnungu adaha kuwakanya want'hu kwa manyonge yaihile,

naho adaha kuitenda imili yawe ilumise lupisi lwose.

20 Hata nk'hande hakuiyona mwiile,

naho hata nk'hande yedi yamgela kinyala.

21 Mwili wakwe usila kwa kunyala,

naho mavuha yakwe yakefisile haluse yaoneka kuse.

22 Na yehe ehagihi na kuita kwe isi ya wabanike,

file yamgojela imguhe.

23 Mna yumwenga mwa wandima alufu wa Mnungu,

vadahika mtumigwa yumwenga ywa kwe mbingu adaha kwiza kumwambiza,

na kumkumbusa kiya akuungwa kudamanya.

24 Amwonelaga mbazi niyo amgambila Mnungu,

muyokole asekwita kwe isi ya wabanike,

kwaviya sila ya kumyokola ipatikana.

25 Aho mwili wakwe wadaha unde enga mbwanga naho.

26 Umwo akamlombeza, Mnungu naamhitule,

naamvike Mnungu kwa kinyemi,

Mnungu naamtende ekale vedi naho.

27 Naange ha want'hu na kugamba nehidamanya wavu,

"Hidamanye uwagilwa mna Mnungu hanisengele.

28 Mnungu aniyokolaga nisekubanika,

na miye nagendeela kunda mgima."

29 Mnungu amdamanyila ivo mnt'hu nk'hanana nyingi.

30 Yehe amuyokola mnt'hu asekubanika,

na kumwink'ha kinyemi cho ugima.

31 Haluse Ayubu uneva una cho kulonga, goja nitegeleze,

niho nizumile kwa kinyemi kugamba una uwagilwa.

32 Uneva una cho kulonga, longa,

kwaviya naunga kukuona kugamba huna masa.

33 Mna uneva huna dya kulonga nitegeleze miye,

nyamala zii name nenikuhinize mzungu.