1 Niyo Elifazi mnt'hu wa Temani amhitula Ayubu,

2 togola, mnt'hu mta mzungu ahitula kwa ulosi wa ubwalasi?

3 Mnt'hu mta mzungu hakudaha kulonga enga ivo ukulonga

hegu kukegombela kwa mbuli heziina kint'hu?

4 Weye walagisa kubela kumvika Mnungu,

na kuwakindila watuhu wasekumhuwila.

5 Wavu wako nuwo ukukutenda ulonge ivo,

nawe kusagula kulonga enga wadant'hi.

6 Ulosi wako mwenye wakusengela,

yadya ulongile yalava uwona mwako.

7 Togola weye ni mnt'hu ywa nk'hongo kwelekwa?

Hegu weye wandaga aaho umwo Mnungu akaidamanya milima?

8 Togola weye kuimanya mizungu ye kinyele cha Mnungu?

Hegu weye mwenye ukedu ni mta mzungu?

9 Togola weye wamanya mbuli yani iyo suwe hekiimanyize?

10 Kikehiniza mizungu kulawa kwa wadala,

welekwe aho isi yandaga ikei kuumbigwa.

11 Togola kusangalaza akukwink'ha Mnungu ni kudodo kwako?

Hegu milosi ilongigwe kwako kwa ujalamu hiyo kint'hu?

12 Nii umoyo wako wakutenda uihiye na kukont'hola meso yako?

13 Nii kumwiihiya Mnungu

na kulonga mbuli ziihile enga izo?

14 Togola mnt'hu adaha kunda heena lema hameso ha Mnungu?

Hegu elekwe ni mvele adaha kunda muwagilwa hameso hakwe?

15 Kwaviya Mnungu hakuwahuwila wadya watumigwa wa kwe mbingu,

na yehe amanya kugamba watendaga yaihile.

16 Kwa kindedi hamhuwile mnt'hu akuihiza naho msavu,

akuungisa kudamanya uwihi enga ivo akunywa mazi.

17 Haluse nitegeleze miye nenikulagise, nohugambile yadya niyaone,

18 awo wata mizungu nawanihiniza ikindedi,

wahinaga kulawa kwa wakale wawe,

hawafisile kinyele chawe.

19 Awo nawo wenk'higwa isi,

naho hehali mta kwiza naawadant'hilize.

20 Mnt'hu mwavu mazuwa yose apata masulumizo,

miyaka yose waikilagwa ukwakwa.

21 Izwi dya vitiso nevimeme mwe magwitwi yakwe,

anakeona kunda ywedi, mwavu naambanange.

22 Mwavu hana kawiilo dya kunyilika mwe diziza,

uheelo wakwe ni kubanika.

23 Angadikaga akazungula nk'hande, akagamba kikuhi,

anamanya kugamba zuwa dya ziza di hagihi.

24 Masulumizo na usungu vamgela wogofi,

vamwizila enga seuta akeikile lumwe kwa nk'hondo.

25 Uwo nuwo uheelo wawe,

awo nawo wakumhiga Mnungu,

na kukeduvya kwa Mnungu mta udahi.

26 Awo wakeduvya naho wasaguka,

uku akanda na nk'hindilo nk'hulu itogile.

27 wakeika lumwe kutowana,

naho wasunguza kutowana na Mnungu.

28 Mna awo nawekale mwe mizi ya mahame,

na kwikala mwe zinyumba hazikwikalwa,

mna nk'hondo neibanange mizi na nyumba izo.

29 Woho hawagendeele kunda wagoli kwa lupisi lutali,

vose wananavo hevikalise,

hata vizuli vawe nevage.

30 Hawafose mwe diziza dye file ,

woho ni enga maziti,

matambi yawe nayokigwe nu moto,

mabwali yakwe nayapuputiswe hale ni nk'hung'unt'ho.

31 Wasekukedant'hiliza wenye kuhuwila uwihi,

kwaviya hawapate maliho yeyose.

32 Nawalihwe enga ivo viwagilwe,

umwo wakanda hawanati kubanika,

na matambi yakwe hayande yekwani.

33 Nawaliganyizwe na mizabibu ikuhugutula zabibu mbisi,

enga mzaituni ukutomosa mabwali yakwe.

34 Wose hewekumvika Mnungu nawande hawakweleka,

moto nowoke kaya za wadya wakuunga matundu ya soni.

35 Awa nawo wakuika mizungu ya uwihi,

mioyo yawe nayo yalava udant'hi.