1 Ayubu niyo amhitula Sofali. 2 Tegelezeni kwa wengele zimbuli huwagambileni,

aho naho nomnde mnisangalaza miye.

3 Finyilizeni umwo halonga,

na umwo habinda ukulonga, gendeleeni kunibela.

4 Togola miye namlabila mnt'hu?

Nna icho kikuleka hikudaha kunyamala.

5 Nikauleni mwehelwe,

nanywe nomgubike milomo yenyu kwa mikono.

6 Umwo hafanyanya mwa yadya yanipatile nogoha,

naho mwili wangu wazingiza.

7 Kwaajili yani waihi wagendeela kwikala?

Wakagendeela kudalahala, naho wagendeela kunda na upati.

8 Wawaona wana wawe wakanda na upati,

naho wawaonela kinyemi wezukuluwe wakakula.

9 Mnungu hakwigala mp'halanyuka mwawe zinyumba zawe,

naho hahali akwikala kwa wogofi.

10 Majeku yawe yatongela naho hayakuhungukilwa na ludole,

mbuguma ne zimoli zawe zeleka naho hazikubananga nda.

11 Awafoseza wana wawe wadodo enga fyo, wakaseziga seziga enga fyo dya ngoto.

12 Wakema wila kwa mazeze na vinubi,

naho waonela kinyemi izwi dya miluli.

13 Want'hu waihi wekala miyaka ina upati,

hawakunda na makunt'ho mwo wikazi wawe hata dizuwa dya kubanikila.

14 Mna wamgamba Mnungu, Kileke suwe!

Hakikunga kumanya sila zako.

15 Zumbe Mnungu nie ani hata kimdamanyile ndima?

Hata kina mlombeza naakink'hei?

16 Woho wafanyanya kugamba waketenda wenye kunda wagoli,

ivo nakeika hale na ulangilizi wa waihi.

17 Mna ni nk'hanana nyingahi lumuli lwa waihi lwazima?

Hegu nk'hanana nyingahi woho wakapata mp'halanyuka.

Hegu Mnungu akawakoma kwa maya yakwe,

18 Mnungu hakuwapuputisa enga mani yanyaile yakupuputiswa ni mp'heho,

hegu enga luvumbi mwe nk'hung'unt'ho.

19 Nyuwe mwagamba, Mnungu awasengela wana kwajili yo wavu wa watati zawe.

Mna miye nagamba Mnungu awasengela awo wakumtendela wavu,

vileke awalagise kugamba wadamanya wavu!

20 Waihi wasengelwa wenye kwajili yo wiihi wawe

waungwa waone wenye maya ya Mnungu.

21 Kwaviya aho waihi wakanda wabanika,

hawagendeele kufanyanya ayedi yakuwapata wana wawe?

22 Togola eyuko mnt'hu yoyose akudaha kumhiniza Mnungu umanyi,

Hegu yehe niye akuwasengela hata wakwikala kwe mbingu?

23 Mnt'hu yumwenga abanika akanda na ludole lukint'hile,

akanda na utondowazi na kinyemi.

24 wabanika wakanda na kinyemi haheina kusulumila.

mili yawe ikanda igimbala.

25 Mtuhu abanika na usungu mkulu wa moyo,

akanda akei kupata mbuli yoyose yedi.

26 Hata ivo wose wabanika na kumoselwa msanga,

wose wagubikwa kwa nt'hende.

27 Tegelezeni, miye namanya fanyanyi zenyu zose

na mizungu yenyu ya kunibela.

28 Mwagamba, "Ikuhi haluse nyumba ya uyo mnt'hu mkulu,

nyumba ekale mnt'hu mwiihi ikuhi?"

29 Togola hamuwauzele womboka sila?

Togola hamtegeleze vint'hu wakulonga?

30 Mnt'hu mwavu ahauswa mwe dizuwa dya mp'hlanyuka.

Naho kugamba mwihi ayokolwa mwe dizuwa dya maya ya Mnungu?

31 Hehali wakuwalongeleza waihi?

Hegu wakumliha kwa yadya adamanye.

32 Umwo anaguhigwa kwigalwa mwe kikuta,

kikuta chakwe nekinde na waamizi

33 Want'hu wengi wakelunga mwo ludongo lwa kuita kwo kummosela msanga,

naho umwo akamoselwa msanga ulongo wauseleza mp'halahole.

34 Ivo nyuwe mwadaha vivihi kunisangalaza kwa uwo uhezi wenyu?

kila icho mkunigambila ni udant'hi du!