1 Niho Elihu agendeelaga kulonga. 2 Togola wamanya kugamba mbuli ino ni uwagilwa,

weye wagamba hina masa ha Mnungu.

3 "Hegu kumuuza Mnungu ni kwa vivihi wavu wangu wakulumiza?

hegu napatai uneva hitendile wavu?"

4 Miye nenikuhitule weye,

na wambuyazo.

5 Hake kaula zimbingu

kaula ivo mavunde yeli kulanga vitendese.

6 Uneva kudamanya wavu, hiyo haikumlumiza Mnungu,

Uneva unadamanya uwihi nk'hanana nyingi,

iyo haikumgela nk'huswank'huswa.

7 Iyo yamwambizai Mnungu?

hahana chochose Mnungu akupata kulawa kwako.

8 Uwihi wako noumbanange mnt'hu enga weye,

na uwedi wako wadaha kuwaambiza weyawo.

9 Want'hu waugula kwajili ya masulumizo,

ivo walombeza wambizi kulawa kwa wata ludole.

10 Mna hahali akumuiiya Mnungu, Muumbi ywawe,

uyo akuwenk'ha kawiilo mwe lupisi lwawe lwa ziza,

11 Hawakumwiiya Mnungu uyo akitenda suwe kinde na mizungu,

wata mzungu kujink'ha makala hegu madege.

12 Want'hu awo walombeza wambizi mna Mnungu hakuhitula,

kwaajili ye myoyo yawe midala na uwihi wawe

13 Naho kuila kwawe ha Mnungu hi kint'hu,

kwaviya Mnungu haawaone hata kuwategeleza.

14 Togola naadahe vivihi kukutegeleza umwo ukagamba hukumuona!

naho masa yako ye hakwe naho waungigwa umgoje,

15 Weye kufanyanya kugamba Mnungu hakusengela,

yehe hakukaulisa want'hu wakadamanya wavu.

16 Hi kint'hu kwako kugendeela kulonga,

ni pwilili kugamba weye humanyize icho ukulonga.