1 Niho Zumbe Mnungu amhitulaga Ayubu kulawa mwe nk'hung'unt'ho, akagamba.

2 Nyuwe ni wahi mkuuza mbuli zangu,

kwa mbuli heziina kint'hu na za kihezi?

3 Utoge enga mgosi,

name nenikuuze, na weye unihitule.

4 Nokundahi umwo haika nk'hongelo ze isi?

Uneva kumanyisa hake nigambile neinda vivihi.

5 Niani aikile vihimo vakwe?

Hegu achulule sigi ya kuhimila?

Togola weye wamanya uhituzi wakwe?

6 Togola nk'hongelo yakwe yaikagwa mnanga ye mbwani?

Hegu ni ani aikile iwe kulu dya nk'hongelo?

7 Mtondo wa zuwa idyo nt'hondo zakemaga hamwenga,

na viumbwa va kwe mbingu valavaga izwi kwa kinyemi.

8 Niani aikile mihaka ye bahali,

hadya yatulikaga enga yalawa mwe zinda?

9 Ni miye niigubike ibahali kwa mavunde,

na kuivugala mwe diziza.

10 Miye ni miye naikilaga bahali mihaka,

na kuikindila mwe zint'hendelo zakwe.

11 "Naigambaga uheelo wako ni aha,

aha niho mijubwaniso yako neiheele aha."

12 Togola Ayubu mwo wikazi wako wose,

ivo weye wandaga udigambe zuwa ditandazuke?

13 Togola wandaga uugambe ung'azi ugubike isi?

Na kugulusa uwihi uhalawe hant'hu hakwe hakukefisa?

14 Ung'azi wa nomsi watenda vigulu na vizuto vaoneka pwilili,

enga suke ikebilinge,

yanda pwilili enga kiwalo mwe nyungu ya ulongo.

15 Ungazi wa nomsi kwa waihi hiyo wedi,

kwaviya wawakindila kudamanya uwihi.

16 Togola wabulaga mwe zinc'hoko ze mina ye bahali?

Hegu kugenda ho mwina we bahali?

17 Togola waonaga nk'hili ze file?

Hegu want'hu wombokaga hant'hu hana ziza dititihale?

18 Togola wamanya ukulu we isi?

nigambile uneva kuyamanya aya yose.

19 Togola ukalo wo ung'azi ukuhi?

diziza nadyo dyakalahi?

20 Hegu wadaha kuulagisa ung'azi uite uhale wani?

Hegu kuuvuza uko ulaile?

21 Kindedi wamanya kwaviya weye ni mdala vitendese,

nawe wandaga wiyuko umwo isi yaumbwagwa.

22 Togola wengilaga mwe digulu dya balafu?

hegu kuona magulu ye fula ya maiwe?

23 Ivo naviika kwajili ya zuwa dya makunt'ho,

naho kwajili ye dizuwa dya kutowana nk'hondo.

24 Ikuhi sila ikuita mwe chotoko cho lumwemwe kudya ukupangwa?

hegu mp'heho ya ulailo wa zuwa kudya ikwanjazwa?

25 Niani asimbile mikologombe kwajili ya mazi mengi ya fula?

na kuhagila isila kwajili yo lumwemwe,

26 Niani akwitungula ifula hant'hu haheina want'hu wakwikala?

27 Niani akwitungula ifula he isi ye dijangwa,

vileke mani yasuke?

28 Togola ifula hegu mnyuzu vina tati yawe?

Hegu niani atendile matwent'hwe ye fula?

29 Togola mami yawe dye balafu ne mp'heho niani?

30 Iyo ikuhitula mazi kunda maiwe

na kutoga mwe mnanga mwe bahali.

31 Togola wadaha kulunganya hamwenga fyo dya nt'hondo za Kilimilwa?

Hegu wadaha ukalohola sigi za Olioni?

32 Togola wadaha kuzilongoza nt'hondo mwe misimo yakwe?

Hegu wadaha kumlongoza kala dikwitangwa dubu na mwanawe?

33 Togola, wazimanya sigilizi zikulongoza kwe mbingu?

Togola sigilizi za kwe mbingu wadaha kuzitenda zilongoze isi?

34 Togola wadaha kuyabongeela mavunde kwo ulanga na kuyagamba,

mavunde yanye fula?

35 Hegu weye wadaha kuulagiza lumwemwe,

naho wadaha kwiza kwako, "Kuusigiila ndima"?

36 Niani aikile mzungu kwa want'hu?

vileke abunk'hule mbuli kwa umanyi?

37 Ni ani mta ubala wa kudaha kuwaza mavunde?

hegu ni ani akudaha kugidula mavunde vileke fula itike?

38 Fula iyo ikutenda luvumbi unde sanga itogile.

na kutozana inde nt'hope.

39 Togola wadaha kumzunguila simba nk'hande ya kudya?

vileke adye egute?

40 Umwo wakakefisa mwe zimp'hanga zawe,

hegu umwo wakanyatila mwe zimp'hanga zawe?

41 Ni ani akuwenk'ha kungulu nk'hande,

umwo wakangadika wakanda na sala,

na wanawe wakaiila nk'hande?