1 Ayubu niyo amhitula Zumbe Mnungu.

2 Namanya kugamba wadaha kudamanya mbuli zose,

naho wadaha kudamanya chocho ukuunga.

3 Waniuzaga nii napelemba mzungu wako?

Kwaviya miye ni mhezi vitendese,

nalongaga vint'hu hivimanyize.

Mwe mbuli nyingi za kwehela hizimanyize.

4 Wanigambaga nitegeleze umwo ukalonga,

naho nigeze kuhitula uhituzi wako.

5 Kindedi nehinda hiva mbuli zako izo ulongile,

mna ivi haluse hiona kwa meso yangu mwenye.

6 Kwaivo naona soni kwa yadya nilongile,

naho nakeseleza mwo luvumbi na kukeiila.

7 Umwo Zumbe Mnungu eze abinde kulonga na Ayubu, amgambilaga Elifazi Mtemani, "Maya yangu yakweela mnanga mwako na mwa wambuya zako waidi kwaviya hamlongile kindedi mwangu enga mndima ywangu Ayubu ivo alongile. 8 Haluse elo guheni majeku mfungate na madolome mfungate mwite nayo kwa mndima ywangu Ayubu mkalave malavo yo kokwa kwajili yenyu. Naye mndima ywangu Ayubu naawalombezeleni, name nenive kulombeza kwawe naho heniwasengele enga ivo nomkaungwa. Kwaviya hamlongile kindedi mwangu enga mndima ywangu Ayubu ivo adamanye."

9 Ivo Elifazi Mtemani na Bilidadi Mshuhi na Sofali Mnaamati, wadamanyaga enga Zumbe Mnungu ivo awagambile, naye Zumbe Mnungu ayazumilaga malombezo ya Ayubu.

10 Umwo Ayubu eze abinde kuwalombezela wambuyaze, Zumbe Mnungu amwink'haga Ayubu nk'hanana mbili kujink'ha ayo endile nayo nk'hongo. 11 Niho wanduguze wose wagosi kwa wavele na kila yumwenga ammanyize aho nk'hongo, wezaga niyo wadya hamwenga naye mwe nyumba yakwe. Wamsangalaza kwajili ya masulumizo yose ayo Zumbe Mnungu andaga kamwigaila. Kila yumwenga wawe amwink'haga Ayubu masawa na mp'hete ya zahabu.

12 Zumbe Mnungu aivikilaga miyaka itimile yo wikazi wa Ayubu kujink'ha idya ya nk'hongo. Andaga na ngoto alufu mlongo na kane na ngamia alufu mtandatu na majeku alufu mbili na mp'hunda alufu imwenga.

13 Naho andaga na wana kiliume mfungate na wana kike watatu. 14 Mwana kike ywa nk'hongo amwitangaga Yemima, ywa kaidi ni Kezia, ywa katatu Keleni Hapuki. 15 Mwe isi yose iyo hakwendile na wavele wedi enga wana kike wa Ayubu. Ise awenk'haga ukipe enga ivo awenk'hile wakuluze.

16 Ayo yeze yomboke, Ayubu ekelaga miyaka gana dimwenga na milongo mine, awaonaga wazukuluwe na vilembwe vakwe vose mpaka mwe cheleko cha kane. 17 Ivo Ayubu abanikaga akanda mdala wa miyaka mingi.