1 Hiika ndagano miye mwenye,

yasekumkaula mndele kwa kummunk'hila.

2 Ni kint'hu chani Mnungu naakidamanyile?

aliha vivihi udamanyi wa mnt'hu?

3 kwa wadya wakudamanya uwihi,

Mnungu naawegaile mavuma na ubanangi?

4 Togola Mnungu hakuziona sila zangu,

na kuumanya wikazi wangu.

5 Nakelisa hidamanye wavu wowose,

naho higezile kumdant'hiliza mnt'hu.

6 Namlombeza Mnungu anilaule masa yangu,

naye naamanye kugamba hina masa.

7 Uneva wikazi wangu hiyo wedi,

hegu kumunk'hilwa no uwihi,

hegu uneva mikono yangu idamanya uwihi,

8 Ivo viya nihandile wadye watuhu,

na yadya yose yahotile kwe nk'honde yangu yang'oligwe.

9 Uneva nehimunk'hilwa ni mvele ywa mnt'hu

hegu uneva hinyata mwo lwivi lwa mbwiyangu,

10 Ivo mkazangu naamwambikile mgosi mtuhu,

na wagosi watuhu wagone naye.

11 Kwaviya mnt'hu akutenda wavu enga uwo vaugwa asengelwe kubanika.

12 Uneva himuungisa mvele ywa mnt'hu mtuhu, neinde kwangu enga moto wa ubanangi.

naho woke kila kint'hu nnanacho.

13 Uneva hilemela kuwategeleza wandima wangu we kivele na wa kigosi,

yadya nawakawagilwa kuikink'higwa,

14 Uneva hidamanye ivo nadaha vivihi kukimala ha Mnungu?

Naho nenilongei hadya Mnungu akeza kunisengela?

15 Kwaviya Mnungu uyudya aniumbile miye,

niye amuumbile mndima ywangu iviya iviya.

16 Miye hinati nilemele kuwaambiza wakiwa,

naho hiwalekile wadya wabanikilwe ni wagosi wawe wekale kwa kufa chevu.

17 Togola hidya nk'hande nikedu,

haheina kuwalekela wanank'hiwa nawo wadye chochose?

18 Mna wikazi wangu wose nandaga hawalela wanank'hiwa na wavele wafiilwe ni wagosi zawe.

19 Hegu kuwaona want'hu wasulumila kwa kuswesa suke,

na want'hu wakiwa hewena suke.

20 Nehiwenk'ha mavalo ya mazoya yadamanywe ni ng'oto ayo yalaile mwe difyo dya ngoto zangu,

aho niho nawanitogole kwa myoyo yawe yose.

21 Uneva nezaga kuwadant'hiza wana nk'hiwa,

nehamanya kugamba neninde mhumi kwe kitala.

22 Ivo mikono yangu isomoke,

naho ing'oligwe ifose mwe maega yangu.

23 Kwaviya nogoha kusengelwa ni Mnungu,

miye hikudaha kudamanya mbuli enga iyo.

24 Uneva hiika kawiilo dyangu mwe zahabu,

hegu kuigamba zahabu weye uywedi naho ni wamizi wangu.

25 Togola hipata kunda na kinyemi na ugoli wangu,

hegu kukefenyela uwingi wa vint'hu ivo nandaga navo.

26 Hinati kudivika dizuwa mwo ung'azi wakwe,

hegu kuuvika mnenge mwo uwedi wakwe.

27 Hizaganywe kuivika milungu,

kwa kunonela mkono wangu kwa kulagisa wogohi kwa zuwa na mnenge.

28 Kwa kudamanya ivo hegu nahaungwa kusengelwa kubanika,

kwaviya mbuli iyo yalagisa kumlemela Mnungu.

29 Mnk'hondo ywangu eze asulumile hione kinyemi,

hegu kukaula kwa kinyemi masulumizo umwo yeze yamwizile.

30 Hinati kudamanya wavu kwa kumlombeza Mnungu awakome wank'hondo wangu.

31 Wandima wose mwe nyumba yangu wamanya,

kugamba nk'hanana zose nehiwahokela na kuwenk'ha nk'hande watakwiza.

32 Hahana mtakwiza agonile kuse,

kwaviya nehiwasingila wakeza.

33 Want'hu watuhu wakombeka kufisa wavu wawe,

mna miye hinati nifise wavu wangu.

34 Hinati nogohe kiya chendile kilongwe na want'hu,

hinati ninyamale hegu kukevugaila kwe nyumba,

kwa kogoha kubelwa.

35 Uneva nokunda na mnt'hu wa kunitegeleza,

hegu nehikelisa kila mbuli hulonga ni kindedi,

Mnungu anihitule.

Uneva malongelezo ayo yakugalwa ni mhigani wangu,

yendile yawandikwa vileke niyaone.

36 Nahavala kwa kukefenya mwe maega yangu,

na kukevika enga taji mwo mtwi wangu.

37 Nehimgambila Mnungu yose nidamanye,

nehikimala ho undiilo wakwe, haheina kogoha enga mwana seuta.

38 Hinati nihande vihandwa mwe sanga hiyo yangu,

uneva natendile ivo sanga iyo hegu neinisengela.

39 Uneva hidya nk'hande ilimigwe mwe nk'honde haheina maliho,

na kuwaleka wandima wabanike kwa sala.

40 hant'hu hakuhota ngano na shaili,

yahote magugu na miwa.

Uheelo wa yadya alongile Ayubu.