1 Niho Elifazi yudya alaile Temani amuuzaga Ayubu.

2 Togola miye nnaunga kulonga na weye noukeive vihile?

Kwaviya hikudaha kukekindila nisekulonga.

3 Tegeleza, weye kuwahiniza wengi,

naho wawaambizaga want'hu wasokele wande na ludole.

4 Ulosi wako wawenulaga wadya wafaga chevu,

naho wawatogezaga wadya wandaga haweina ludole.

5 Mna haluse makunt'ho aya yakwizila weye nawe kufa chevu,

naho kwingila wogohi.

6 Togola kumvika Mnungu kwako hidyo kawiilo dyako?

naho udamanyi wako wedi nuwo mwigamo wako?

7 Hake fanyanya. Ni muwagilwa yuhi akudugana na mp'halanyuka?

Ni kuhi uone wata uwedi wabanangwa pele?

8 Ivo miye nimanyize na kupelemba,

wakuhanda yaihile nawavune yaihile.

9 Mnungu awakoma kwa muye wakwe, kwa sindo ya maya yakwe wabanika.

10 Waihi wabuma enga simba,

mna meno yawe yatulwa.

11 Simba yabanika kwa kuswesa ludyo,

na awo wana simba wapangana.

12 Ulosi wanizilaga kwa kinyele,

name nayevaga yadya yatakamizwe.

13 Handa mwe kufanyanya zisozi za nekilo zikugela kiyangayanga, umwo nt'hongo zizamile zikuwapata want'hu.

14 Nogohesaga niyo nazingiza,

na mwili wangu wose niyo wengila lukeng'ent'ha.

15 Mp'heho yombokaga he futa yangu,

fili nazo zo umwili wangu zakimalaga.

16 Mp'heho iyo yakimalaga,

mna nisekumanya yandaga ni kint'hu chani,

naonaga enga kint'hu chandaga ha meso yangu,

kwandaga kunyamalikizana niyo neva izwi dikalonga.

17 "Togola mnt'hu adaha kunda mhuwilwa kujink'ha Mnungu?

Togola mnt'hu adaha kunda ywedi kujink'ha Muumbi ywakwe?

18 Uneva Mnungu hakuwahuwila wandima wakwe,

na watumigwa wakwe wa kwe mbingu awaona wana masa,

19 togola havitendese awo want'hu waumbigwe kulawa mwo ulongo,

awo wakudaha kutigint'hwa enga sondo?

20 Kwa lupisi luguhi du want'hu wadaha kubanika,

kubanangwa ulo na ulo haheina kuleka hata kilagiso.

21 Woho ni enga hema dikudaha kugwa!

Ivo wabanika haheina kunda na mzungu."