1 Ayubu niyo amhitula,

2 Nyuwe want'hu mwakeona kugamba mwamanya kila kint'hu,

naho mwafanyanya kugamba umwo mnabanika hokunde na umanyi naho.

3 Miye namanya enga ivo mkumanya nyuwe,

miye name ni mbala kujink'ha nyuwe.

Kila mnt'hu ayamanya ayo mkulonga?

4 Hata wambuya zangu waniseka,

waniseka ikanda miye nna uwagilwa na hiina lema,

hinda seko kwa want'hu.

5 Nyuwe hamna makunt'ho, mna mkei mwanibeza,

nyuwe mwamtoa mnt'hu abunt'hike,

6 Wahoki na want'hu hewemmanyize Mnungu wakeona enga wekala kwa utondowazi

hamwenga na kugamba wegamila ludole lwawe enga mnungu nywawe.

7 Hata madege na mifugwa wananayo yabindile wingi yakuwahinizani.

8 Hegu uzeni viumbwa va mwe isi na mwe bahali umanyi wawe.

9 Wose wamanya kugamba udahi wa Zumbe Mnungu nuwo uwatendile.

10 Mnungu niye akulongoza wikazi we viumbwa vose,

na ugima wa kila kint'hu umwe mikono yakwe.

11 Ni enga viya lulimi lwako ukubweda mwile we nk'hande,

na magutwi yako yelelwa kwa kwiva milosi?

12 Wadala wana mizungu,

na kwa wadya wekale kwa lupisi lutali.

13 Mna umanyi na udahi ni va Mnungu,

yehe ana umanyi na ubala.

14 Anamola hahana akudaha kuzenga naho,

anamvugaila mnt'hu hahana akudaha kumkomoela.

15 Uneva Mnungu anakindila fula chapata nk'hangu,

anayakomoela amazi chapata lawo.

16 Yehe ana ludole na mzungu,

wose wakudant'hilizwa na akudant'hiliza we mwe mikono yakwe.

17 Yehe ahausa mzungu wa vilongozi,

na kuwatenda vilongozi wadamanye enga wabwalasi.

18 Yehe ahausa udahi wa maseuta na kuwatenda enga wavugailwa.

19 Yehe awatenda walavant'hambiko na wata ludole waone soni.

20 Yehe awatenda walangilizi wakuhuwilwa wanyamale,

na kuhausa mzungu wa wadala.

21 Awagela soni wata udahi,

na kubananga udahi wa vilongozi.

22 Awalagisa want'hu mbuli za kinyele, naho yehe alangaza hant'hu hana ziza.

23 Azitenda isi zinde nk'hulu na zitogile,

Naho azihuma na kuzibananga.

24 Awatenda vilongozi we isi wande wabwalasi,

na kuwaleka wangadike wakanda wazaganywa na uheelo wawe ni kwaga.

25 Wababasa babasa mwe diziza na kuzembeduka enga wakozi.