1 Umwo yeze yajike ayo Ayubu akongaga kulonga akaligita dizuwa dyo kwelekwa kwakwe.

2 Ayubu niyo agamba, 3 zuwa dyo kwelekwa kwangu diligitwe

na kilo kiya chalongagwa kuna ubovu wa mwana kilume.

4 Zuwa idyo hegu dyahitulwe dinde ziza.

Zuwa idyo hegu dyagile hata houndiilo wa Mnungu,

naho ung'azi usekudilangazila.

5 Zuwa idyo hegu dyasigale mwe kizuli cha ziza,

vunde titu digubike,

ziza dya nomsi diditise.

6 Naho kilo icho hegu dyahauswe vitendese, hegu disekuwazwa mwe dizuwa dyo mwaka,

hegu usekuwazwa mwe dizuwa dyo mnenge wowose.

7 Kilo icho mvele yeyose asekuinula nda,

izwi dya kinyemi disekwivika mndani mwakwe.

8 Wagambileni wasai wadiligite zuwa idyo.

Wadya wakumanya kumwitanga Lewiyasani vileke adikump'hukile zuwa idyo.

9 Kilo icho nt'hondo zakwe zinde ziza,

zizungule ung'azi mna zisekuupata

naho zisekuona ung'azi hata uneva kucha.

10 Zuwa idyo diligitwe kwa kunitenda nelekwe,

hegu kwa kunitenda niyaone makunt'ho.

11 Nii hyelekwe handa hibanika?

Nimbwai hibanike umwo nandile halawa mwe inda?

12 Nii mnala akanigata?

Naho nii akanonk'heza?

13 Nabanike mwo lupisi ulwo hegu nehihumula kwa utondowazi,

14 hegu nagonile enga maseuta ne vilongozi we isi,

awo wazengega mazumba, ivi haluse yenda mahame,

15 naho hegu nagonile enga wana seuta,

awo wamemezaga zahabu na masawa mwe zinyumba zawe.

16 Hegu nii himoselwe msanga enga katiti kabanikile kwe inda,

naho enga kank'henya hakaone ungazi?

17 Uko kwe isi ya wabanike want'hu waihile waleka nk'huswank'huswa,

naho uko wasokele wahumula.

18 Uko wavugailwa wana kinyemi kwa hamwenga,

hawakutegeleza naho maizwi ya wakimalizi wawe.

19 Wagoli kwa wakiwa weyuko,

naho watumwa nawalekelwa kulawa kwa wakulu wawe.

20 Nii ung'azi wang'ala kwa wadya wendile mwe makunt'ho,

na wadya wata usungu wenk'higwa ugima?

21 Wakugojela kubanika mna hawakubanika,

Wadya wakuzungula kubanika kujink'ha kindolo kifisigwe.

22 Awo nawande na kinyemi, na kwanga umwo wanabula mwe kikuta.

23 Nii nigendeele kunda mgima,

na miye hikuona sila ya kuhinga.

24 Hant'hu hakudya nk'hande miye naila du,

masozi yangu yaseela enga mazi ya mto.

25 Kiya hogoha nicho nikipatile,

diya nandaga hogoha dinipata

26 Hina utondowazi hegu kuhumula;

hikudaha kuhumula naho makunt'ho yangu hayana uheelo.