1 Ayubu niyo amhitula, 2 mbuli enga izo nazivaga nyingi,

Kunisangalaza kwenyu kwanink'ha masulumizo.

3 Togoleni nomgendeele kulongesa mpaka ini?

hegu kuna mbwai hata mgendeele kuhigana na miye?

4 Uneva nyuwe mwandile enga miye na miye enga nyuwe,

nehayalonga yose yadya nyuwe mkulonga

nehadaha kulava milosi yedi ya kuwasengela,

nehadaha kusingisa mtwi wangu kulagisa kugamba nna mizungu.

5 Nehadaha kuwasangalaza kwa ulosi wangu,

naho ulosi wangu wa kuwasangalaza nayakawenk'hani kutondowala.

6 Hata nnalonga masulumizo yangu hayakusila,

hegu hata nnanyamala hakukuusa usungu.

7 Kindedi Mnungu kanisakaza,

kawabananga pele want'hu wa mwe nyumba yangu wose.

8 Kanitenda ninyale, na want'hu wafanyanya kugamba ni mta wavu.

Kunyala kwangu kwongezekela vitendese,

na awo wafanyanya kugamba miye hidamanya wavu.

9 Mnungu kanitatula kwa maya na kunikaula kwa kuniihiya,

naho kanda enga mnk'hondo wangu akunikaulisa

10 Want'hu wanilonga kwa lubezo na kuniseka,

wadugana hamwenga nakunitowa mwe funda.

11 Mnungu kaniika mwo udahi wa want'hu makwank'halu, na kunileka nihumwe na want'hu waihile.

12 Nehinda hitondowala vedi,

mna Mnungu kanyakamila dilaka,

kwa kunitowa na kunihonda,

kanitenda kitalo che misale yakwe.

13 kanilasa kwa msale kulawa kila nt'hendelo,

misale yanilasa na kunigela nk'hwenge,

naho kukongela aho haniolele mbazi.

14 Anilumiza kaidi idi,

anitowa enga mtowani aihiwe naho akuniihiya.

15 Hikesumila suke za magunia kulagisa kugamba nahongeza,

hitoigwa na kwikala mwo luvumbi.

16 Futa yangu inda ink'hundu kwa kuila,

makumbitu yangu yanda matitu tii.

17 Hata ivo mikono yangu haidamanye uwihi,

na malombezo yangu ni yedi kwa Mnungu.

18 Weye isi, usekuigubika sakame yangu itike,

ndilo yangu neyenele kila hant'hu.

19 Hata ivi haluse muwona wangu e kwe mbingu,

mta kunigombela e kulanga.

20 Wambuya zangu wanibela,

meso yangu yalawa masozi kwa kumlombeza Mnungu.

21 Naunga mnt'hu wa kunigombela ha Mnungu,

enga ivo mnt'hu akudaha kumgombela mbwiyaye.

22 Miyaka yangu isigale ni migeke,

name nenibanike heniuye naho.