1 Niho Elihu agendeelaga kulonga: 2 Nifinyilizeni hadodo naho mnitegeleze,

kwaviya nna cho kulonga kwaajili ya Mnungu.

3 Umanyi wangu ni mkulu naho nenitende kwa kiya nimanyize,

na kulagisa kugamba Muumbi ywangu ni mhuwila.

4 Yose ayo nohugambile ni ya kindedi,

miye ni hameso hako ni mta mzungu wa kindedi.

5 Mnungu ni mta ludole lutendese mna hakumbela mnt'hu yeyose,

hakuna kint'hu heemanyize,

6 Hakuwaleka waihi wagendeele kwikala,

mna awenk'ha uwagilwa awo wasulumizwe.

7 Yehe awamila wata uwagilwa,

kuwalekela wekale enga maseuta,

na kutogolwa ulo na ulo.

8 Mna uneva want'hu wanyinywa mwe minyololo,

wasulumila kwa kiya wadamanye.

9 Mnungu awalagisa wavu wawe,

na kugamba woho wana kitugu.

10 Awatenda awo kwiva makanyo yakwe,

na kuhituka na kuuleka uwihi wawe.

11 Uneva wanamzumila Mnungu na kumdamanyila ndima,

nawekale mwo wikazi wawe wose kwa utondowazi naho mbuli zawe nezigende vedi.

12 Mna uneva hawanamzumile ivo nawabanike kwa uhezi wawe,

naho nawabanike kwa kuswesa ubala.

13 Hewekumwogoha Mnungu wakanda na maya mwe mioyo yawe,

hata umwo wakasengelwa hawalombeze wambizi.

14 Wabanika wakanda wakei wabwanga,

na uheelo wo wikazi wawe ni soni.

15 Mna Mnungu awahiniza want'hu kombokela masulumizo,

na kombokela makunt'ho ayafinyula meso yawe.

16 Mnungu akulavaga mwe makunt'ho,

na kukuleka uonele kinyemi mwo kwamilwa kwako,

na meza yako ikanda imema nk'hande.

17 Mna haluse wasengelwa, wasengelwa enga ivo uwagilwe.

18 Kenege vileke maya yanase kukudant'ha,

hegu ukulu wo ugoli wako wanase kukuzaganya,

19 Togioa ugoli wako na udahi wako mkulu,

wadaha kukuambiza usekwingila mwe makunt'ho?

20 Usekuungisa kilo kize,

umwo want'hu wakaaga kulawa aho weli.

21 Kenege usekuutimila uwihi,

masulumizo yako yaletigwa vileke unde hale nawo.

22 Kumbukila udahi wa Mnungu ivo wili mkulu,

ni ani akudaha kumhiniza vedi enga yehe?

23 Ni ani akudaha kumgambila cha kudamanya?

hegu kumgambila weye kubananga?

24 Yehe atogolwa kwa kiya akudamanya,

na yewe waungwa kumtogola.

25 Kila mnt'hu kayaona yadya adamanye Mnungu,

mna chayaona kwa hale.

26 Mnungu kakulisa naho hakikudaha kummanya,

hegu kuwaza miyaka yakwe.

27 Yehe ayaguha mazi mwe isi,

na kuyavuza yande mant'hwent'hwe ye fula.

28 Aitenda fula inye kulawa kulanga,

na kuwanyeela want'hu wose.

29 Ni ani akumanya ivo mavunde yakugenda

hegu lukuwa ivo lukunt'hint'hila?

kulawa mwo ulanga ukwo akwikala Mnungu.

30 Yehe atenda lumwemwe kwenele mwo ulanga,

mna mwina we bahali wasigala ziza.

31 Kwa kukigaila fula nyingi

chapata nk'hande nyingi.

32 Akindila lumwemwe kwa mikono yakwe,

na kuisigiila itowe hadya akuunga.

33 Lukua lwabwelekeza kwiza kwa fula nk'hulu ihagihi,

hata mifugwa yamanya kugamba yeza.