1 Nauwiihiya vitendese ugima wangu,

nenigendele kulabila ivo nilumile vitendese naho nilonge kwa usungu.

2 Nenimgambile Mnungu, usekunisengela,

mna unigambile hibanangai?

3 Togola ni vedi kwako unihujile,

kuniilemela miye uniumbile,

uku ukanda na kinyemi mwe mizungu ya waihile?

4 Togola wakaula vint'hu enga ivo wakuona want'hu? Hegu waona enga ivo wakuona want'hu?

5 Togola wikazi wako mguhi enga udya wa want'hu?

hegu miyaka yako ni enga ya mnt'hu

6 hata upelembe uwihi wangu,

na kuuzungula wavu wangu?

7 Weye wamanya kugamba miye hina masa,

naho hahana wa kuniyokola mwe mikono yako.

8 Mikono yako niyo iniumbile na kunitenda ivi nili,

mna haluse wanibananga.

9 Kumbukila kugamba waniumbaga kwa ulongo,

togola nounivuze naho mwe sanga?

10 Weye ni weye umwink'hile ludole tate lwa kunipata miye,

ni weye utendile nikule mwe ndaa ya manala?

11 Waumbaga mwili wangu kwa mavuha ne misipa,

na kunilunganya kwa nyama na nk'handa.

12 Wanink'haga ugima na kunitendela uwedi,

mwo ulangilizi wako waamila muye wangu.

13 Hata ivo mbuli izi wazifisaga mwe kinyele chako,

na miye namanya kugamba ayo yandaga mwo ubala wako.

14 Wandaga ukagojela uone uneva hidamanya wavu,

vileke ulemele kunihausila uwihi wangu.

15 Hangi miye mwenye uneva nna masa!

Uneva miye ni mhuwila hikudaha kukeduvya,

kwaviya miye himema uhuza nnayakaula masulumizo yangu.

16 Uneva nnaketenda hitoga, nouninyatile enga simba,

na kunilagisa udahi wa kutisa mwangu.

17 Weye waleta waona wahya wanihige miye,

na kongezela maya yako mwa miye,

wanigaila wank'hondo wahya wanitowe.

18 Kwaajili yani wanilekaga nelekwe?

Neinda vedi kubanika umwo want'hu hawanati kuniona.

19 Nehigalwa mpaka kwe kikuta,

neinda vedi nandile hihali.

20 Togola mazuwa ya wikazi wangu hiyo mageke?

Nilekele vileke nidahe kupata lupisi lugeke lwa kunda ne kinyemi.

21 Umwo hinati kuita hant'hu uko heniuye naho,

mwe isi ina kinyulu na ziza dititihale.

22 isi ina ziza enga kilo gati,

isi iyo ung'azi wakwe ni enga ziza.