1 Kwaajili yani Zumbe Mnungu asekuika lupisi kwajili ya usengelo,

hegu lupisi lwa wawagilwa kwa want'hu wakumdamanyila ndima?

2 Want'hu wahausa viwalo mwe mihaka mwe zink'honde zawe,

na watuhu nawo wabawa ng'oto na kuziika mwa mafyo yawe ya mifugwa.

3 wawahokaga wana nk'hiwa mp'hunda zawe,

na kuika lahani ng'ombe ya kulima ya abanikilwe ni mgosiwe.

4 Wawakindilaga wakiwa wasekupata uwagilwa wawe,

na kuwatigiza heweina kint'hu wanyilike na kukefisa.

5 Ivo wakiwa ni enga mp'hunda za kwe nyika,

zikuzungula nk'hande kwe nyika,

hahana hant'hu hatuhu aho wakudaha kupata nk'hande ya wana wawe.

6 Woho wasokoza mwe nk'honde hiyo zawe,

nakulogota zabibu mwe zink'honde za waihi.

7 Nekilo wagona haheina kint'hu cha kukegubika,

hawana kint'hu cha kuwasikiza ne mp'heho.

8 Wanyeelwa ni fula mwo mnima,

wandaga mwo luwe vileke wasekunyeelwa ne fula.

9 Want'hu waihi wawatenda watumwa wana heweina tati yawe,

wawaguha wana nk'hiwa enga maliho ya kutigizwa.

10 Wana nk'hiwa wagenda kimbwigili kwa kuswesa suke,

wavunaga ngano huku wakanda ne sala.

11 Wakamaga mavuta ya zeituni haheina kuluma,

wakama divai mna wakasulumila kwa nk'hilu.

12 Na kwo mzi want'hu wehagihi na kubanika waila kwa usungu,

mna Mnungu hakutegeleza kulombeza kwawe.

13 Weyuko watuhu waihi hawakuunga ung'azi,

hawaumanyize ung'azi hegu kuita uko ung'azi.

14 Mkomi enuka kilokilo,

na kugenda kuwakoma wakiwa,

kilo kinabula ndima yakwe ni kubawa.

15 Mhabwasi naye agojela ziza dingile,

naye afisa futa yakwe vileke asekuoneka.

16 Kilo cha ziza wabavi wavuna zinyumba,

mna nomsi akefisa kuunyilika ung'azi.

17 Woho wogoha ung'azi wa nomsi,

mna watuhu wakogoha ziza woho waketenda ziza nidyo mbwiya ywawe.

18 Mna waihi wakubilwa ni malawo,

hant'hu ho ukalo wawe mwe isi haligitwa ni Mnungu,

hawakuita naho kudamanya ndima mwe zink'honde zawe za mizabibu.

19 Enga balafu ivo ikulungumka kwa zihuye na kwa nk'hangu,

nivo waihi wakwaga mwe isi ya wabanike.

20 Hata wamami zawe wawajala,

want'hu waihi hawakumbukilwe naho wadigwa ne zint'hende na kubanangwa enga maziti yagwele.

21 Ayo yalaila kwaviya wawatendelaga vihili wavele wabanikilweni wagosi wawe,

naho hawawatendele ayedi wavele heweina wana.

22 Mna Mnungu kwa udahi lwakwe awausa wata ludole,

hamwenga na kugamba wekala vedi mna hawana kawiilo dya ugima.

23 Mnungu adaha kuwaleka wakeone kugamba wekala vedi,

mna meso yakwe yaona sila zawe.

24 Waihi wapata kwa lupisi ludodo du

mna wanyulaka enga mani.

enga mabuwa ya mamp'hemba yasengigwe.

25 Togoleni, mnt'hu yeyose adaha kuyalemela aya?

Niani akudaha kulonga uwona kugamba milosi yangu hi kindedi!