1 Mnt'hu ana ndima ndala mwe isi

aungingwa kudamanya ndima kila zuwa enga mndima,

2 Yehe ni enga mtumwa akuunga kizuli,

naho enga mndima akugojela kulihwa.

3 Mna kwangu hina chochose cha kukawiikla mwe miezi yose,

name nna masulumizo kila nekilo.

4 Umwo hagona nagamba, nokuche ini?

Kilo chose nhitukahituka mwo lusazi hikupata nt'hongo mpaka kwacha.

5 Mwili wangu umema nt'hende na usavu,

nk'handa yangu inyala na kutumbuka naho yalawa ufila.

ufila wamint'huka mwe zink'hwenge zangu.

6 Mazuwa yangu yasunguza komboka enga kint'hu cha kufumila,

nazo zabula uheelo wakwe haheina kukawiila.

7 Weye Zumbe Mnungu kumbukila wikazi wangu ni enga muye,

na kinyemi changu kisila.

8 Akuniona haluse hanione naho,

nounizungule mna hihali.

9 Enga vunde ivo dikuhauka niyo dyaga,

nivo weli want'hu wakubanika naho hawakuuya.

10 Haauye naho ekale mwe nyumba yakwe,

na want'hu wammanyize nawamjale.

11 Kwaivo hikunyamala,

nelonge kulagisa masulumizo yangu,

nenilabile kulawa mwo usungu wo moyo wangu.

12 Togola, miye ni bahali hegu kala kulu dikwikala mwe mazi matali,

hata uniike mwo wamizi?

13 hagamba nnagona mwo lusazi nenihumule,

na masulumizo yangu nayahunguke.

14 Wanitisaga kwa sozi,

naho kunitenda nogohe kwa maona.

15 Ni vedi kukenyogotola

na kubanika kujink'ha masulumizo aya.

16 Hingila chevu, naho hisokela kunda mgima.

Nilekeni kwaviya wikazi wangu hi kint'hu.

17 Want'hu ni kint'hu chani hata umkaule?

niyo wamfanyanya mwo moyo wako?

18 Weye weza kuwakaula kila mtondo,

na kuwageza kila lupisi.

19 Togola nougendeele kunikaula mpaka ini,

haheina kunilekela hata kwa lupisi ludodo du?

20 Uneva hidamanya wavu hutendelei weye mwamizi wa want'hu?

Nii ninde nyambilo kwajili ya yadya ukuunga?

Togola miye hinda nt'hwika kwako?

21 Kwajili yani kulemela kunilekela,

na kuniusila wavu wangu?

Kwaviya lupisi luguhi neniite kwe kikuta changu,

weye nawe nounizungule mna honione naho.