1 Ayubu niyo amhitula Elifazi,

2 Uneva usungu wangu unadaha kuhimwa, naho masulumizo yangu yanaikwa mwe kihimo,

3 nayande yazama kujink'ha msanga wa mp'hwani,

nivo vikuleka hilonga haheina kufanyanya.

4 Zumbe Mnungu kanilasa kwa misale,

naho usungu we misale yenela mwo mwili wangu.

Mnungu kanigaila makunt'ho makulu yakunitenda nogohe.

5 Togola mp'hunda ya kwe mbago yaila ikanda na mani,

hegu ng'ombe ikaila ikanda na nk'hande?

6 Togola want'hu nawaone vedi umwo wakadya nk'hande heeina munyu,

hegu ulemu we ditagi kwadaha kunda no umwiile?

7 Moyo wangu walemela hata kutoza nk'hande izo,

izo ni nk'hande zikuniihiza.

8 Yandile Mnungu anink'hile kiya hulombeza,

nevinda vedi anink'he kiya huunga.

9 Ivo Mnungu aungile kunihonda, hegu nakunikoma yehe mwenye!

10 Hegu atendile ivo miye nehinda no utondowazi,

kwaviya hipata makunt'ho yatendese.

hamwenga na kugamba nk'hanana zose hiizumila milosi ya akukile.

11 Mna hina ludole lwa kufinyiliza,

Hina kikunitenda nigendeele kunda mgima.

12 Togola miye nna ludole enga iwe? Hegu mwili wangu ni enga shaba?

13 Togola nnanao udahi wowose wakunambiza miye mwenye,

kila mwigamo uhauswa kwangu.

14 Mnt'hu ananda mwe makunt'ho aunga wambwuya wakumwambiza,

hata uneva himleka Mnungu.

15 Mna wambwiya zangu wanidant'hilizaga

enga vizuto va lulpisi lugihi du,

16 vigubikwe ni balafu vikulungumka,

na balafu ikefisile mndani mwawo.

17 Mna mwo lupisi lwa kubwikana mabalafu yalungumka,

naho mwe kiangazi vasigala vizuto heviina mazi.

18 Misafa ya wachuuzi yaga sila wakazungula mazi,

wakwela mwe nyika na wabanikila uuko.

19 Misafa ya wachuuzi wa Sheba na Watema wazungula mazi,

20 mna wahuzaga mnk'handa mwe vizuto ivo kwaviya kawiilo dyawe dyagaga,

21 Nyuwe ni enga vizuto ivo,

mwaonaga masulumizo yangu niyo mwauya kunyuma kwa wogofi.

22 Togola hiwalombezani kint'hu chochose

hegu higambani mlave matundu kwa mnt'hu vileke miye nihone,

23 hegu mniyokole kulawa mwa wank'hondo na want'hu heweena mbazi?

24 Vedi, nihinizeni name neninyamale zii,

nigambileni aho nibanange.

25 Milosi ya kindedi ina ludole!

Mna kuhigana kwenyu hakuna kint'hu?

26 Togoleni mwafanyanya kugamba mwadaha kuyapelemba yadya nilongile?

Kwaviya hina kawiilo, mwafanyanya kugamba milosi yangu hi kint'hu?

27 Mwadaha hata kutoa simbi awo wana nk'hiwa,

na kuwataga wambwiya zenyu vileke mnde wagoli!

28 Mna haluse mwaungigwa mnikaule na miye heniwadant'hilizeni.

29 Fanyanyeni naho msekunisengela,

kwaviya miye ni mnt'hu ywedi.

30 Togoleni mwafanyanya kugamba nadant'ha

bule kwaviya namanya yaihile na ayedi.