1 Zumbe Mnungu agendeelaga kumgambila Ayubu. 2 Togola ukei wagendeela kuhigana na miye Mnungu?

Togola nouleke hegu nougendeele kuhitula.

3 Niho Ayubu amhitula Zumbe Mnungu.

4 Miye hi kint'hu nohitule mbwai?

naho henigeze kulonga chochose.

5 Nalongaga vitendese kujink'ha viya nahaungwa.

nehitigiza mna henigendeele kulanga naho.

6 Niho Zumbe Mnungu amhitulaga Ayubu kulawa mwe nk'hung'unt'ho.

7 Utoge kigosi,

naho unihitule umwo hakuuza.

8 Togola weye walonga kugamba miye hiyo mlamuzi ywa kindedi?

Togola waunga kulagisa kugamba weye ni muwagilwa mna miye ni mta malema?

9 Togola weye una ludole enga miye?

Hegu izwi dyako dyadaha kulava izwi dya lukuwa enga ni miye?

10 Uneva wafanyanya kugamba wadaha ukayadamanya aya yose, lagisa ukulu wako,

walagise want'hu wose udahi wako na ukulu wako.

11 Wakaule wose wana kitugu,

itila maya yako na uwatende wakeseleze.

12 Mkaulise kila mta kitugu na umtende aseele,

naho uwahonde waihi hadya wakimale.

13 Uwamosele msanga wose,

uwavugaile mwe isi ya wabanike.

14 Niho miye mwenye neninde ywa nk'hongo kukutunya,

miye name nenizumile kugamba udahi wako mwenye zadaha kukuyokola.

15 Mkaulise yudya kiboko diya dikala dikulu,

miye hidiumba weye nawe hikuumba,

mna yehe adya mani enga viya akudya ng'ombe.

16 Kaula, ludole lwakwe lumwe vigudi vakwe,

kaula udahi wakwe umwe mahinda ya nda yakwe.

17 Mkila wakwe wasingisika enga mti wa mwelezi,

viga vawe vikulu naho vitoga.

18 Mavuha yakwe ni enga mabomba ya shaba,

na viga vakwe vitoga enga kilama.

19 Dyoho ni dimwenga mwa makala ya nk'hongo mwe viumbwa vangu naviumbaga,

ni miye nikedu hudaha kudihuma.

20 Yoho yadya mani yakunda mwe vigulu,

ukwo nuko makala ya kwe mbago yakuseziga.

21 Dyagona hasi ye visaka maziti na miwa,

na kukefisa mwa madete ye mnk'handa mwa mazi.

22 Ahumula mwe zimp'heho che miti ina miwa,

na miti ikuhota mk'handa ye vizuto.

23 Umwo mto unamema dyoho hadikogoha,

hata uneva mto Yolodani yamemile mpaka kulanga,

mna dyoho dyaona ni vedi du.

24 Niani akudaha kudigwila kudisita meso?

hegu niani akudaha kugwila mp'hula yakwe mwo mtego?