1 Kindedi kuna mabome ya kusimba maiwe ya yombe,

naho hana hant'hu aho ikusunt'hwa zahabu.

2 Want'hu wasimba kilama hasi yo ulongo,

na shaba yalungumswa kulawa mwe maiwe ya shaba.

3 Wakusimba wamanya ivo vokulangaza ung'azi mwe diziza,

woho wapelemba hasi ye isi,

umwo wakazungula maiwe ya yombe.

4 Wasimba mabome hale na aho wakwikala want'hu,

hegu viga va want'hu hevinati kubula,

wasimba mabome ya madini,

ukwo wadamanya ndima wakanda wenye du,

wakatozeleza sigi mwe dibome.

5 Vihandwa va nk'hande vakula mwe isi,

mna hasi yakwe want'hu watula maiwe kwa moto.

6 Mazuwe ye isi yanda na madini ya yombe nk'hulu yakwitangwa safaya,

na luvimbi lwa maiwe ayo yanda na zahabu.

7 Hata sumula na madege matuhu yana meso ya kuonesa,

hayakudaha kumanya uko weli wasimbi.

8 Simba na makala mbago matuhu,

hayanati kubula uko.

9 Want'hu wasimba maiwe yatogile vitendese,

wasimba vigulu na kuvihausa hale.

10 Atula mabome hagati yo luwe,

na meso yakwe yaona maiwe ya yombe kulu.

11 Wasita zinj'hoko za mazi zisekuseela,

na kuvilava kuse hata viya vikefisile.

12 Mna mzungu wadaha kupatikanahi?

Ni hii kikudaha kuhina mbuli kwa uwedi?

13 Hahana mnt'hu amanyize uwedi wo mzungu,

naho haukupatikana mwe isi ya wata ugima.

14 Hant'hu ha mazi matali mwe vizuto vagamba, mzungu haumuli mndani mwangu,

naho hant'hu ha mazi matali mwe bahali hagamba, haumuli kwangu.

15 Mzungu haukudaha kuguligwa kwa zahabu,

hegu kuhima kihimo kikulu cha masawa,

16 Zahabu yedi na maiwe ya yombe,

hayakudaha kugula mzungu.

17 Mzungu ni ya yombe kujnk'ha zahabu,

hegu nyungu ya zahabu heikudaha kugula mzungu.

18 Mzungu una yombe kulu

yombe dyakwe hiyo enga yombe dya lulu.

19 Madini ya topazi kulawa Kushi iyo ikwitangwa Esiopia haikudaha kuligana nayo,

naho haikudaha kugulwa kwa zahabu yedi.

20 Elo haluse chotoko cho mzungu kikuhi?

Hegu umanyi wekalahi?

21 Ikefisa ha meso ha viumbwa vose vina ugima,

naho madege ya kulanga hayakudaha kuiona.

22 Hata file na isi ya wabanike valonga,

wakagamba kivaiva du zikalongwa.

23 Ni Mnungu ekedu akumanya sila yo mzungu,

amanya hant'hu aho wili.

24 Kwaviya yehe aikaula mpaka mwo uheelo we isi,

naho aona kila kint'hu ki hasi ne mbingu.

25 Aho Mnungu aink'haga mp'heho ludole,

na kuika mihaka ya mazi.

26 Hegu hadya Mnungu aungaga fula inye,

na sila ikomboka mavunde ya lumwemwe na lukuwa,

27 aho niho aonaga mzungu na kuhima uwedi wakwe,

na kuizumila.

28 Niyo Mnungu amgamba mn'thu,

"Kaula kunda na wogofi kwa miye Zumbe Mnungu nuwo mzungu,

naho kukeika hale no uwihi nuwo umanyi."