1 Niyo Bilidadi uyo Mshuhi amhitula Ayubu.

2 Togola kubinda kulonga mbuli zako heziina kint'hu?

3 Togola wagamba Mnungu hakudamanya uwagilwa?

Hegu azaganya ikindedi?

4 Wanao nawande wamtendela Mnungu wavu,

yehe kawenk'ha usengelo kwa wavu wawe.

5 Uneva unaleka zifanyanyi zako na kumlombeza Mnungu kwa kukombeka,

6 na kwikala wikazi wa uwedi na uhuwila,

kindedi Mnungu neeze kukwambiza,

nakukuvuzila uwagilwa mwo wikaqzi wako.

7 Ugoli uwazile nounde hiyo kint'hu,

ukaliganyiza na kiya Mnungu naakwink'he.

8 Ukauze vyeleko vilongole,

naho uone ayo wabunk'hule wakale wawe.

9 Ivo suwe chelekwa ivinoivino naho hakimanyize dyodyose,

mazuwa yetu ya mwe isi yomboka enga kizuli.

10 Mna want'hu wakilongoelaga kwelekwa nawakuhinize,

naho utegeleze kiya wakuunga walonge

11 "Togola ndulutu zahotela hant'hu haheina mazimazi?

hegu ngage yahotela haheina mazi!

12 Umwo zikagendeela kukula zikanda zikei kukant'higwa,

zinaswesa mazi zasunguza kunyala kujink'ha mani matuhu.

13 Nivo wili uheelo wa awo wose wakumjala Mnungu,

Kawiilo dya wadya hewekumhuwila Mnungu nedyage,

14 na kawiilo dyawe ni enga bwilili.

15 Dyaketozela mwo luzi lwakwe mna halukimala?

Togola waneketozeleza umwo nawatoge?"

16 Want'hu waihile ni enga lukoka,

kukanda na fula na zuwa yekala vedi mwe kiunga.

17 Maizi yakwe yakezinganiza mwe maiwe,

na kuketozela mwe kila luwe.

18 Mna yanango'lwa kulawa hant'hu hakwe,

hahali naamanye kugamba yandaga aaho.

19 Kaula, uwo nuwo uheelo wa kinyemi cha want'hu awo,

na hant'hu hawe nawaguhe watuhu.

20 Mna Mnungu hamduule mnt'hu muwagilwa,

hegu hawaambize waihi.

21 Yehe naakutende useke naho kwa kinyemi.

22 Mna yehe naawagele soni wadya wakukuihiya,

naho kaya za waihi nezihauswe.