1 Ayubu agendeelaga kulonga, 2 nakelisa kwa Mnungu,

Yehe hekunink'ha uwagilwa wangu na kuutenda wikazi wangu unde na usungu.

3 Umwo akagendeela kunink'ha ugima, muye wa Mnungu ukanda haunati mndani mwangu.

4 Mnomo wangu houlonge udant'hi,

naho lulimi lwangu holumdant'hilize mnt'hu.

5 Hikudaha kugamba nyuwe mwalonga kindedi,

mpaka kubanika kwangu nagamba hina masa.

6 Uwagilwa wangu nautozeleza naho hikuuleka,

moyo wangu hounisengele mwo lupisi lwose hagendeela kwikala.

7 Wose wakunihiga na kutowana na miye,

wasengelwe enga waihi na heweena uwagilwa,

8 Togola mnt'hu hekumtunya Mnungu ana kawiilo dyani,

umwo lupisi Mnungu akaunga kuhausa ugima wakwe?

9 Togola Mnungu naive ndilo yakwe, umwo anezilwa na makunt'ho?

10 Mwihi hakudaha kunda na kinyemi mwa Mnungu mta udahi,

naho heekalise mwo kumlombeza Mnungu.

11 Hake gojeni niwahinizeni ivo Mnungu eli na udahi,

miye name neniwagambileni yadya akuunga ayadamanye.

12 Nyuwe wenye muyaona yadya adamanye Mnungu.

Haluse kwaajili yani mwalonga aya heyeena kint'hu?

13 Neniwagambile kiya Zumbe Mnungu akudamanya kwa waihi,

Yehe awasengela makwank'hwalu ivo wawagilwe.

14 Wanawe hata wande wengi nawakomigwe kwe nk'hondo,

welekwa wakwe hawande na nk'hande ikukint'ha.

15 Awo wasigale nawabanike kwa manyonge yaihile,

na wavele wafiilwe ni wagosi zawe hawawahongezele.

16 Waihi wadaha kunda na matundu mengi enga luvumbi,

na mavalo enga kilongo,

17 na yadya yose mnt'hu mwiihi akeikile kindolo, mta uwagilwa niye naayapate,

matundu yawe nayo nawakepangile want'hu haweena masa.

18 Nyumba akuizenga mwavu ni enga bwilili,

ni enga kaheha ka mtumwa akwamila mgunda.

19 Waihi wagona wakanda wagoli,

mna wakenuka wanda wakiwa,

20 Vitiso vamwizilaga enga malao kwa kipump'ha,

na nk'hung'unt'ho ya nekilo neiwapuputise.

21 Mp'heho ya ulailo wa zuwa nouwahagile wafose mwe zinyumba zawe,

22 mp'heho iyo yamguha haheina mbazi,

naagendele kuwatowa umwo woho wakageza kunyilika.

23 Nk'hu'hunt'ho neimtimile umwo akanyilika,

na umwo wakanyilika hant'hu hakwe kwa wogofi.