1 Aya yose hiyaona kwa meso yangu, na kuyeva kwa magutwi yangu mwenye.

2 Miye namanya enga ivo mkumanya nyuwe,

miye hiyo mnt'hu msokezi kujink'ha nyuwe.

3 Mna nehaunga nilonge na Mnungu mta udahi,

nehaunga kumlagisa Mnungu kugamba nna uwagilwa

4 Yose yadya mlongile mwa miye ni udant'hi du,

nyuwe nyose ni enga wagangana hewena kint'hu.

5 Mwandile hamwalongile kint'hu, mnt'hu nakawafanyanyani kugamba mna mizungu!

6 Haluse tegelezeni aya hulonga, tegelezeni ivo huwahembeleza

7 Togola mwamanya kugamba nomumdamayile ndima Mnungu kwa kulonga udant'hi?

Mwafanayanya kugamba udant'hi wenyu wamwink'ha kint'hu chochose Mnungu?

8 Togola nomgeze kumuungisa Mnungu kujink'ha?

Hegu mwadaha kumgombela Mnungu mwe kitala?

9 Uneva Mnungu ana wapelemba togola naaone dyedi kwenyu?

Hegu mwadaha kumtenda Mnungu kabwalata enga ivo mkuwatenda watuhu?

10 Kindedi yehe naawafank'hile,

uneva mnalagisa lukunde kwa kinyele.

11 Na ludole lwakwe nouwagele wogofi.

12 Simo zenyu haziina kint'hu ni enga maivu.

Malongelezo yenyu yasokela enga ivo wili ulongo.

13 Nyamaleni name nilonge,

akajika lekeni kize chochose kikuunga kinipate.

14 Miye mwenye hikeika lumwe kwa yose nayalaile.

15 Mnungu anikome anaunga, hina dya kwaza,

hata ivo nenizigombele sila zangu ho undiilo wakwe.

16 Vadahika nnadamanya ivo neinde uyokozi wangu,

kwaviya mnt'hu mwiihi hakudaha kukimaala ho undiilo wa Mnungu.

17 Tegelezeni ulosi wangu, na yadya hulonga yevike mwe magutwi yenyu.

18 Haluse hikeika lumwe kwajili ya kuita kwe kitala,

kwaviya miye namanya hina masa.

19 Niani akudaha kuhigana na miye?

Uneva ni ivo neninyamale zii niyo nabanika.

20 Nakulombeza weye Mnungu unink'he miye mbuli mbili,

miye name henikefise hale na weye.

21 Usekunisengela, naho usekunitenda nogohe kwa wogofi wako.

22 Nitange mwe kitala name nenikuhitule,

hegu nilonge miye na weye uhitule.

23 Masa yangu na wavu wangu wi vivihi?

Nilagise masa yangu na wavu wangu.

24 Nii wakefisa nisekukuona?

niyo wanitenda miye enga mnk'hondo wako?

25 Togola nouditise dizani dikupuluswa ni mp'heho

hegu kuyagulusa mabunt'hi yakupuluswa ni mp'heho?

26 Kwaviya kuwandika mbuli zina usungu,

na kunitenda ninde mkipe ywa wavu wa ubwanga wangu.

27 Kuvugaila viga vangu mwe zip'hingu,

na kuzamila sila zangu zose,

kwa kuika kiwalo mwe nyayo zangu.

28 Ivo mnt'hu abanika enga kint'hu kikuola,

enga suke imunguke.