1 Hisokelesa naho ni hagihi kubanika,

hakihali kisagale mna ni kikuta.

2 Kindedi wadya wakunibela wanizunguluka, lubezo lwawe naluona pwilili.

3 Weye Mnungu unambize ninde mlekelwa,

kwaviya hahana mtuhu wa kunigombela.

4 Umanyi wawe kuugubika wase kuukombaganya

ivo elo usekuwaleka wanihume.

5 Mnt'hu akusezenga wambuyaze vileke ande mpati,

meso ya wana wakwe nayadunduge kuona.

6 Mnungu kanitenda nisekigwe ni want'hu,

hinda mnt'hu wa kubelwa.

7 Hina udahi wa kuona vedi kwaviya nehihilisa,

vilungo vangu vose vinda enga kizuli.

8 Want'hu wa Mnungu wehelwa wekayaona aya yakunilaila,

naho heweena malema waihizwa na wadya hewekumuogoha Mnungu.

9 Hata ivo wahuwilwa nawatimile sila zawe,

na wadya wakudamanya ayedi nawagendeele kupata ludole vitendese.

10 Mna nyuwe nyose uyeni naho,

henimpate mnt'hu mta mzungu mwa nyuwe.

11 Mazuwa yangu yehagihi kusila na mizungu yangu idunduga,

kawiilo dyangu dihauka.

12 Wambuya zangu wakitenda kilo kunda nomsi,

wagamba ung'azi wi hagihi

mna miye namanya ni mwe diziza.

13 Kwaviya nyumba yangu ni kwe isi ya want'hu wabanike,

nenigone umwo mwe diziza.

14 Uneva nenikitange kikuta tate,

na awo zint'hende zikunidya,

nenizitange mnala na lumbu dyangu,

15 Togola kawiilo dyangu dikuhi?

Niani akudaha kuona kawiilo dyangu?

16 Ayo ukawiila hayaite hamwenga na miye kwe isi ya want'hu wabanike,

umwo neniseele kwe isi ya wabanike.