1 Ayubu niyo amhitula.

2 Kindedi namanya ivo nivo vili.

Mna mnt'hu adaha vivihi kunda ywedi ha Mnungu?

3 Uneva mnt'hu aunga kuhigana naye,

haadahe kumhitula Mnungu hata nk'hanana imwenga mwe mbuli alufu imwenga.

4 Yehe ni mta mzungu vitendese naho ana udahi mkulu,

niani akuhigana naye na kumhuma?

5 Yehe ahausa milima uku yenye hekumanya,

na kwa maya yakwe aibananga.

6 Yehe aisingisa isi kulawa hant'hu hakwe,

na kuitenda mikola yakwe izingize.

7 Alagiza dizuwa disekunt'hont'homoka,

azigubika nt'hondo zisekulava ung'azi.

8 Yehe ekedu niye aikile mbingu hant'hu hakwe,

na kujata mjubwaniso we bahali.

9 Yehe niye aziikile nt'hondo,

za Dubu na Olioni na Kilimilwa na fyo dya nt'hondo za kusini.

10 Adamanya mbuli nk'hulu hezikuhimika,

mbuli zo kwehela hezikuwazika.

11 Kaula, Zumbe Mnungu omboka hagihi na miye mna hikumuona, niyo akeitila haheina miye kumanya.

12 Umwo akaguha kiya akuunga, "Niani akudaha kumkindila?

Niani akudaha kumuuza wadamanyai?"

13 Mnungu haakindile maya yakwe,

hata uneva ni fyo dya mazimwi makulu ya mwe bahali nedifunamize mitwi yawe hasi kwa wogohi.

14 Togola miye nenizilavehi mbuli za kumhitula Mnungu?

15 Hata uneva nandaga muwagilwa mna nadundugaga kumhitula,

yehe niye wa kunisengela, icho hulombeza anionele mbazi.

16 Hata uneva namwitange naye niyo anihitula,

hehadaha kuhuwila kugamba anitegeleza.

17 Yehe nakanibananga kwa nk'hung'unt'ho nk'hulu,

na kongezekela zink'wenge zangu haheina kint'hu.

18 Hakunileka nihumule hata hadodo, q wikazi wangu kaumemeza usungu.

19 Uneva ni kuhigana, yehe ni mta ludole!

Uneva ni mbuli ya uwagilwa niani akudaha kumwigala kwe kitala?

20 Hata nandile hina masa ulosi wangu nounisengela,

ikanda hina masa yehe nakanilagisa masa yangu.

21 Hata uneva miye hina masa hi kint'hu kwangu,

miye nauwihiya wikazi wangu,

22 Yose ni yamwenga du,

Mnungu awasengela awedi na waihi.

23 Mp'halanyuka umwo zikalaila want'hu wabanika kimp'humpa,

na Mnungu asekela mavumo ya want'hu wakufa cheevu haweina masa.

24 Yehe kalekela isi ikailwe ni want'hu waihile,

yehe kayagubika meso ya walamuzi,

uneva hiyo yehe elo ni ani?

25 Mazuwa yangu yagulukisa kujink'ha yudya akuguluka, zasunguza komboka haheina kuona mbuli zedi.

26 Mazuwa yangu yomboka enga ngalawa ikugulukisa mwe mazi,

enga ngwilizi dikukump'hukila ukala wakwe.

27 Uneva nnalonga neniyajale yadya hulabila, nenihause kinyulu na kunda na kinyemi.

28 Mna nogoha masulumizo yangu yose,

kwaviya namanya kugamba Mnungu hanione kugamba hina masa.

29 Uneva nnaoneka ni mta masa, nii nisulumile haheina kint'hu?

30 Hata uneva nnakesunt'ha na sabuni na kuisunt'ha mikono yangu kwa mazi yedi.

31 Hata ivo nounidule mwe dibome,

hata suke zangu mwenye zaniihiya.

32 Mnungu andile mnt'hu hegu nehidaha kumhitula,

hegu nekiitanya mwe kitala vileke kikalamulwe.

33 Hahana hata yumwenga wa kulamula mgati mwetu,

uyo akudaha kulamula mwa suwe waidi.

34 Weye Mnungu usekugendela kunisulumiza,

uniike hale na vitiso vako.

35 Hegu nehadaha kulonga naye haheina kumwogoha,

mna kwaviya nakemanya ivo nili mwo moyo wangu.