1 Mna haluse wabwanga wadodo wanibela,

wabwanga awo tate zawe nawaonaga hi kint'hu,

hata kudikaula kuli dyangu dikwamila ngoto.

2 Awo wakunihomola,

hawakudaha hata kukeambiza woho wenye,

3 Wandaga wasokezi naho wanyaile kwaviya wandaga na sala,

wakazungula nk'hande mwe dijangwa lupisi lwa nekilo

na woho wapataga maizi yo kudya hant'hu hanyalise.

4 Wahaga mani ye miti kwe dijangwa na mani ya kwe mbago niyo wadya,

wadyaga hata maizi yo mti howiina mwile.

5 Wagulusagwa hale na want'hu awo,

watoelagwa lukunga enga wabavi.

6 Waungwagwa kwikala mwe vizuto vinyaile na mwe zimp'hanga,

na mwe mabome yasimbigwe mnk'handa mwe chamoka.

7 Ukwo kwe visaka wailaga enga makala,

wakeduganyaga hamwenga hasi ye visaka.

8 Dyandaga ni fyo dya want'hu wahezi na wabeligwe,

wagulusagwa wahalawe mwe isi.

9 Mna haluse wana wawe wakema mila ya kunihomola,

miye hiyo kint'hu chochose, hinda ni mnt'hu ywa kubelwa ni woho.

10 Waniihiya na kukeika hale na miye,

wakaniona du wanitweela mate mwe kihanga.

11 Kwaviya Mnungu kanitenda nisokele na kubunt'hika,

ivo want'hu wanitendela chochose icho wakuunga.

12 Fyo idi dyagendeela kunitowa,

wakanigulusa na kuunga wanibindilize,

13 Want'hu awo wanikindila nisekunyilika naho wageza kunibananga,

naho hehali mnt'hu wa kunambiza.

14 Weza kwangu kulawa nt'hendelo zose,

na woho wanikump'hukila umwo handa hasi vileke wanikome.

15 Hitozwa ni wogofi,

nt'hunyo yangu ihauswa enga mp'heho,

kwa yadya yose nipatile yahauswa enga vunde.

16 Haluse ni hagihi kubanika,

hakuna lwedilwedi mwe masulumizo yangu.

17 Nekilo mavuha yangu yose yaluma,

na masulumizo yanitoza hayakuhona.

18 Kwa udahi wakwe mkulu Mnungu kanda enga suke ininyinyile,

Mnungu kaikwida isuke mwe singo yangu.

19 Yehe kaniduula mwe nt'hope,

name haluse ni enga maivu.

20 Weye Zumbe naila kwako mna hukunihitula,

nakimala kukulombeza mna hukunitegeleza.

21 Weye wanihitukila haheina mbazi,

naho kunda ahile kwangu.

22 Wanipola na kunipuputisa kwa mp'heho,

waniduula uko na uku kwa nk'hung'unt'ho.

23 Himanya nounigale mpaka kwe file,

hant'hu aho nawadugane wose wata ugima.

24 Uneva mnt'hu kasokela naho ana makunt'ho,

umwo mnt'hu akalombeza wambizi walemela kumwambiza.

25 Togola hikuila hamwenga na wadya wendile mwa makunt'ho?

hiwaonele mbazi wakiwa?

26 Mna umwo nakauile ayedi, yahiile yanizilaga,

umwo nize nigojele ung'azi, ziza nadyo dyanizilaga.

27 Moyo wangu wangadika naho haukuleka mbwitu,

zuwa kwa zuwa napata makunt'ho.

28 Unyonge wangu unitenda nk'handa yangu inde nt'hitu mna hiyo kwa kuhya na zuwa,

hikimala mwe kiyeti cha want'hu halombeza wambizi.

29 Izwi dyangu ni dya kinyulu heiina wambizi,

enga ndilo ya mauzi.

30 Nk'handa yangu inda nt'hitu, na miye nahuma kwa kubwikanisa.

31 Aho nk'hongo nevaga izwi dya zeze dya wila wa kinyulu,

mna haluse neva maizwi ya ndilo na kuhongeza.