1 Ayubu niyo ahitula. 2 Msekufanyanya kugamba muambize hewena udahi,

naho enga ivo mumyokole heena ludole!

3 Togola ni ulangilizi wani wedi mnink'hile?

ikindedi hamnilagise kugamba nyuwe mna mzungu!

4 Togola wafanyanya kugamba niani akuunga ayategeleze ayo ukulonga?

Naho niani akulongoze ulonge ivi?

5 Want'hu wabanike wazingiza kwa wogofi,

awo wakwikala mwa mazi matali wogoha.

6 Isi ya wabanike haikefisile ho undiilo wa Mnungu ,

hahana ngubiko ikusikiza ho undiilo wakwe.

7 Mnungu niye enezaga ulanga wa kasikazini hant'hu haheina kint'hu chochose,

na kuiika si hant'hu haheina kint'hu.

8 Mnungu niye ayamemeza mazi mavunde,

na kuyakindila yasekutulika kwa uzami wakwe.

9 Yehe aufisa mnenge wose kunyuma ya mavunde.

10 Kaika mhaka we bahli no ulanga,

ni hant'hu aho kilo kikusiila niyo msi wakonga.

11 Mikola ya kwe mbingu yazingiza,

akazifank'hila zogoha.

12 Kwa mzungu wakwe aitondowazaga ibahali,

kwa ludole lwakwe adikant'hagakant'haga zoka kulu dikwitangwa Lahabu vihande hande.

13 Kwa muye wakwe adamanyaga ulanga uonekele enga ivo ukuonekela,

kwa mkono wakwe adikomaga diya dizoka dikunyilika.

14 Mbuli ino ni ndodo du mwe udamanyi wakwe,

chayevaga kwa kutakanizwa yadya yakulongwa.

Ni ani akudaha kumanya ukulu wa udahi wakwe?