1 Niyo Elifazi ahitula. 2 Togola mnt'hu adaha kumwambiza Mnungu?

Hata mta mzungu hakudaha kumwambiza Mnungu.

3 Togola kunda muwagilwa kwamwink'hai Mnungu?

Hegu unanda ywedi kwamwambiza kwa chochose?

4 Hiyo kwaviya wamhuwila Mnungu,

nivo vikuleka akukanya na kukwigaila magezo.

5 Bule, ni kwaviya wavu wako ukulisa.

Naho ni kwajili yo uwihi wako wose howiina uheelo.

6 Weye wamtendaga nduguyo akuvuzile matundu ayo awazimaga kwako,

naho waguhaga suke imwenga iyo andaga nayo niyo wamwasa kimbwigili.

7 Humwink'hile mazi yo kunywa uyo asokele,

nawe humwink'hile nk'hande uyo mta sala.

8 Kwaviya kumleka mnt'hu mdahi,

aguhe isi yako,

9 Hiyo du kugamba nokulemela kuwambiza wadya wabanikilwe ni wagosi wawe

naho iviya iviya nokuwabaila na kuwahujila wana nk'hiwa.

10 Nivo vikuleka mitego yakuzunguluka nt'hendelo zose,

na wogohi wakwizila.

11 Nivo vikuleka ziza dikugubika usekuona kint'hu,

na malawo ya mazi yakugubika.

12 Togola Mnungu hehali mwe mbingu za kulanga?

Na yehe azikaula zint'hondo kwa hasi hata uneva zikulanga vitendese!

13 Mna weye wagamba, "Mnungu amanyai?

Yehe kakefisa mwe mavunde adaha vivihi kukisengela?"

14 Weye wafanyanya kugamba mavunde yazamile yamsikiza asekuona,

aho akagenda mwo ulanga we isi.

15 Togola nouitimile sila ya kale,

iyo want'hu waihi waitimilaga?

16 Wabanikaga wakanda lupisi lwawe halunati,

na malawo nayawakubila pele.

17 Awo nawo wamlemele Mnungu,

na kuhuwila kugamba yehe hakudaha kuwatenda dyodyose.

18 Mna Mnungu niye amemeze nyumba zawe vint'hu vedi,

ivo nakakeika hale na ulangilizi wa waihi.

19 Wata uwagilwa wakaona kugamba waihi wasengelwa,

awo wanda na kinyemi na kuwaseka.

20 Wagamba, kindedi wank'hondo wetu wakomigwa,

moto wokaga ugoli wawe usigale.

21 Haluse, Ayubu mmanyise Mnungu vileke unde na utondowazi,

aho naho mbuli zedi nezikwizile

22 Uhokele mahinizo kulawa kwakwe,

naho uwiike mbuli zakwe mwo umoyo wako.

23 Uneva unamuuiya Zumbe Mnungu na kukeseleza nouvuzwe uhya,

na kuuhausa uwihi wose,

udamanyike mwe nyumba yako,

24 viduule vint'hu vako va zahabu,

zahabu ya Ofili uwiduule kwo mto.

25 Zumbe Mnungu mta ludole naande zahabu yako,

naye naande masawa yako ya yombe kulu.

26 Aho niho nounde na kinyemi kwa Mnungu mta ludole,

na kubunk'hula kugamba, yehe niye chotoko che kinyemi chako.

27 Umwo ukalombeza naye naakuhitule,

nawe noudamanye yadya umlagane Mnungu.

28 Kila kiya ukuunga udamanye nekidamanyike,

ung'azi nawo noumulike sila zako.

29 Kwaviya Mnungu awaseleza wadya wakukeduvya,

mna awayokola wakukeseleza.

30 Yehe amyokola yudya heena masa,

naho weye nouyokolwe kwajili yo udamanyi wako wedi.