1 Haluse itanga uwone uneva kuna akuunga akuhitule.

Ni yuhi mwa awo mtumigwa ywa kwe mbingu akuunga akuhitule?

2 Kuika usungu mwo moyo kwamkoma mnt'hu mhezi,

naho finju yamkoma mnt'hu mbwalasi.

3 Namuonaga mbwalasi akekala vedi,

mna nailigitaga kaya yakwe.

4 Wana wakwe hawana wamizi,

nawo hahana mnt'hu ywa kuwagombela.

5 Wata sala nawo wadya ulozo wakwe,

naho kuyaguha hata yemgati mwe miwa,

wata kumunk'hwa nawo waumelamela vitendese ugoli wakwe.

6 Kwaviya yaihile hayakulawa mwe sanga,

naho makunt'ho hayakulaila mwo ulongo.

7 Mna mnt'hu elekwa apate makunt'ho,

enga sese za moto mwo ulanga.

8 Uneva ni miye hegu nehimhitukila Mnungu,

na kumwigaila masulumizo yangu kwake.

9 Yehe adamanya mbuli nk'hulu hezikumanyika,

mbuli zo kwehela hezikuwazika.

10 Yehe alava fula inye mwe isi,

na mazi ya kuseela mwe zink'honde.

11 Awakimalisa wadya wakukeseleza,

na wadya wakuhongeza awenk'ha utondowazi.

12 Aibananga mizungu ya wadant'hi,

vileke udamanyi wawe usekukint'ha.

13 Yehe awagwila wata upapala mwe zinyambi zawe,

naho asunguza kuibananga mizungu yawe.

14 Mwo lupisi lwa nomsi woho waona ziza,

naho kisingi hawakuona enga nekilo.

15 Mna Mnungu awayokola wakiwa wasekukomwa,

awausa heweena kint'hu kulawa mwe mikono ya wata ludole.

16 Ivo wakiwa wana kawiilo,

nawo wakuhujilwa wahauswa.

17 Kavikilwa mnt'hu yudya akukanywa ni Zumbe Mnungu adamanye ayedi,

ivo usekumbela Mnungu mta ludole umwo akatenda ivo.

18 Kwaviya yehe alumiza naho alagula,

yehe alumiza, naho kwa mikono yakwe ahonya.

19 Hata uneva masulumizo nayakulaile nk'hanana mtandatu nayakuyokole,

naho nk'hanana mfungate houpate uwihi wowose.

20 Naawayokole ne file mwo lupisi lwa gumbo,

mwe nk'hondo nk'hulu naakuyokole.

21 Nowamilwe ne zimbuli ziihile za want'hu,

naho howogohe ubanangi uwo ukwiza.

22 Mwo lupisi lwa gumbo na makunt'ho,

naho howogohe makala mbago.

23 Kwaviya howogohe kulima nk'honde zina maiwe,

naho makala mbago hayakukump'hukile.

24 Nouwikale kwa utondowazi mwe nyumba yako,

nouwaze ugoli wako naho hokunde na chochose chagile.

25 Nounde na wana wengi.

nawande wengi enga mani ya mwe isi.

26 Noubanike ukanda ne miyaka mingi mwo udala wako,

enga masukiza ye ngano ivo yakugendeela kukula kubula mwo lupisi lwa kuvunwa.

27 Kidipelemba idi naho kibunk'hula kugamba ni dya kindedi,

ivo ditegeleze na kudidamanyila ndima.