1 Ivo want'hu awa watatu, Elifazi na Bilidadi na Sofali walekaga kumhitula Ayubu, kwaviya akeonaga hana masa. 2 Mna Elihu mwana Balakeli we dikabila dya Buzi wa lukolo lwa Lama adundugaga kukindila maya yakwe, kwaviya Ayubu akeonaga mta uwagilwa naho amlabilaga Mnungu. 3 Elihu iviyaiviya awaihiyaga wambuyaze watatu wa Ayubu kwaviya nawadunduga kumhitula Ayubu na kumgamba ana masa. 4 Elihu andaga kanyamala zii, umwo wadala awo weze walonge na Ayubu kwaviya yehe andaga mbwanga kujink'ha woho. 5 Mna eze aone want'hu awo watatu wandaga hawana kint'hu cha kulonga apataga maya. 6 Ivo Elihu mwana wa Balakeli ywe dikabila dya Buzi niyo akonga kulonga,

Miye ni mbwanga nyuwe ni wadala,

kwaivo nogoha kuwagambileni fanyanyi zangu.

7 Nakegambilaga hikuungwa kulonga,

vileke nyuwe mwikale miyaka mingi mnihinize mzungu.

8 Mna uwo muye umndani ya mnt'hu,

ni muye ywa Zumbe Mnungu mta ludole nuwo ukumwink'ha mnt'hu ande no umanyi.

9 Hiyo wadala wekedu wata mzungu,

hegu hiyo wata myaka mingi wakumanya uwagilwa.

10 Kwa ivo nagamba, nitegelezeni,

miye name neniwagambile idyo humanya.

11 Ivo miye nagojela kiya mkuunga mlonge,

naho nandaga hagoja mkazungula milosi ya mizungu.

12 Nandaga na wengele kuwategeleza mkahamwa umwo Ayubu akalonga,

mna hakwandile na hata yumwenga alagise kugamba milosi ya Ayubu hayandile ya uwagilwa

13 Msekulonga kugamba kina mzungu,

Mnungu vaungwa amhitule Ayubu kwaviya nyuwe mdunduga.

14 Ayubu andaga akalonga na nyuwe na hiyo miye,

ivo hikumhitula enga ivo mkumhitula nyuwe.

15 Mbuli zako Ayubu ziwahuma,

hawana mbuli yoyose ya yakukuhitula.

16 Togola nigendeele kugojela umwo woho wakanda wanyamala du,

woho wekale du naho hawana chochose kituhu cha kulonga?

17 Bule! heninyamale miye name nenilave uhituzi wangu,

naho miye name ninilonge kiya hufanyanya.

18 Nna mbuli nyingi za kulonga,

muye undani mwangu wanitenda nilonge.

19 Uneva hinapatile luneka lwa kulonga,

nenitulike enga kafuko ka nk'hingo kamemile divai mph'ya.

20 Hikudaha kufinyiliza vaungwa nilonge,

vileke nihitule.

21 Milosi yangu heimwink'he uwagilwa yeyose mwa nyuwe,

naho henikehembeleze kwa mnt'hu yeyose.

22 Hegu miye hidahile kumtogola mnt'hu hiyo muwagilwa,

ninatenda ivo Mnungu naasunguze kunifyalika.