1 Togola wadaha kudilowa dikala dikulu dikwitangwa Lewiatani kwa nduwano?

Hegu kudinyinya lulimi lwakwe kwa sigi?

2 Togola wadaha kudigela sigi mwe mp'hula yakwe?

hegu kuponk'hola kwa nduwano mwe zinjeje zakwe.

3 Togola Lewiatani naagendeele kukulombeza umuonele mbazi? Na kulonga na weye kwa ujalamu?

4 Togola naadamanye ndagano na weye vileke umguhe,

ande mndima ywako mwo wikazi wako wose?

5 Togola nomnyinye enga dege dikufugwa,

enga kint'hu cha kuwabwedeza wana kike wako?

6 Togola wachuuzi nawasakanyane uchuuzi wawe kwajili yakwe?

hegu nawakepanganize mwa woho?

7 Togola wadaha kumduila mjungo na kuikoma,

hegu wadaha kutowa misale mwo mtwi wakwe?

8 Unamdosa nk'hanana imwenga houvuzagize naho,

na hooujale naho iyo ink'hondo.

9 Yeyose akuiyona Lewiatani,

aza ludole na kugwa hasi.

10 Hahana eli na udahi wa kumwinula Lewiatani,

togola kuna yeyose mta udahi wa kunihiga naye?

11 Mwo mnomo wakwe kwalawa ndilija,

naho sese zo moto dalika kuse.

12 Nadaha kukugambila mbuli za viga va Lewiatani.

makiga yao yana ludole naho yawagila mwa meso.

13 Ni ani akudaha kuisangula nk'hingo yakwe?

hegu akudaha kuiponk'hola?

14 Niani akudaha kwasamula mnomo we Lewiatani,

meno yakwe yamtenda kila mnt'hu ogohe.

15 Mgongo wakwe ni enga misafa ya nk'hindo,

magwalatu yakwe yatozona enga kilama naho hayakusingisika.

16 Kila nk'hindo ihagihi na iyawe,

hata mp'heho haikudaha komboka.

17 Zilunganywa hamwenga kwa kutoga kila yumwenga na miyawe,

naho zikeng'ang'anila kwa hamwenga naho hukudaha kuzipanganiza.

18 Dinatowa myasi kwanda na ung'azi wapuluikapulika,

na meso yakwe yang'ala enga zuwa dikutotomoka.

19 Ndilija zakwe zikufosa kulawa mwo mnoma wakwe,

na sese za moto zadaikila kuse,

20 Mosi walawa mwe zip'hula zakwe,

enga nk'huni ivo zikukweela hasi ye nyungu,

21 Muye wakwe ni moto ukint'hile ukudaha kukweleza moto,

naho ndilija za moto zalawa mwo mnomo wakwe.

22 Singo yakwe ina ludole lutendese,

want'hu wadihogoha kokose uko dikuita.

23 Mahinda yo mwili wakwe iketozeleza kwa hamwenga,

nyama yakwe itoga naho haikuda kuusigwa.

24 Kifua chakwe kitoga enga iwe,

naho hakikulegela ni enga iwe dya kusagila.

25 Umwo anakimala wata ludole wogoha,

wata ludole wauya kunyuma kwa wogofi,

26 Haihali sime ikudaha kumlumiza,

hegu mjungo hegu msale hegu fumo.

27 Yehe aona kilama kunda enga zani,

na shaba enga mti uwoile.

28 Unamlasa yehe hakunyilike,

unamduila maiwe kwakwe ni enga mabunt'hi.

29 Lungu kwakwe ni enga mabunt'hi,

naho unamduila mjungu yehe aseka.

30 Zinda zakwe zina magwalatu enga vibesu va nyungu itulike,

umwo zikuleka mbuluzo mwe nt'hope.

31 Ajubwanisa mina ya bahali enga nyungu ikutipwilika.

na kuikologa ibahali enga nyungu ya mavuta ya mhemp'he.

32 Umwo akomboka kunyuma yakwe aleka mbuluzo ukumetameta,

na mnt'hu akafanyanya kugamba mwina una fii.

33 Hahana chochose mwe isi kikuligana naye,

yehe ni kiumbwa hekikogoha.

34 Yehe abela kila kala dina kitugu,

yehe ni seuta wa makala yose ya kwe mbago.