1 Niyo Bilidadi Mshuhi amhitula Ayubu, 2 Togola want'hu enga weye hawakunyamala?

unde na umanyi wedi naswe niho nekidahe kulonga.

3 Ni suwe chafanyanywa enga mifugwa, na kuoneka wahezi haameso hako.

4 Weye kukesengasenga mwenye kwa maya yako,

togola isi ilekigwa jangwa kwajili yako,

hegu luwe luhauswe hant'hu hakwe?

5 Ung'azi wa mnt'hu mwavu nouzimwe,

na lulija lwakwe holung'ale naho.

6 Ung'azi mwe dihema dyakwe unda ziza, na lumuli lukumlangazila noluzimwe.

7 Nk'hacho za mnt'hu mwihi nezinde ngihi,

ulangilizi wakwe wiihile noumkinye hasi.

8 Viga vakwe mwenye nevimgele mwo mtego, kila akagenda naadugane na mabome,

9 tasi nedimgwile mwe kiga chakwe na kumtozeleza,

10 Ditasid ifisigwa hasi,

mtego nawo umwe sila yawe.

11 Vikutisa vamgojela kila nt'hendelo,

vamtimila kila nk'hacho naagende.

12 Andaga mgoli mna haluse ana sala

mp'halanyuka zikeika lumwe kumkinya.

13 Unyonge wa kukoma ugenyela mwo mwili wakwe,

naho waoleza vilungo vakwe.

14 Naauswe mwe dihema dyakwe idyo andaga akekala kwa utondowazi,

na kwigalwa kwa seuta kwa vitiso.

15 Want'hu watuhu nawekale mwe dihema dyakwe,

moto wa chola nowitilwe mwe nyumba yakwe.

16 Yehe ni enga mti unyaile maizi na matambi yakwe kulanga yanyala.

17 Nk'humbukila ya kwikala kwakwe neihauswe mwe isi,

naho hehali naadikumbukilke dizina dyakwe.

18 Na yehe naahauswe mwe isi ya wagima,

kulawa mwo ungazi na kuhinga mwe diziza.

19 Hana wana hegu wezukulu, hahana asigale mwe kaya yakwe.

20 Want'hu wakwikala usweelo wa zuwa wehelwa kwa yadya yampatile,

want'hu awo wakwikala ulailo wa zuwa wazingizaga kwa wogofi 21 Ayo nayo nayampate mnt'hu mwavu,

ayo nayo nayampate mnt'hu heemmanyize Mnungu.