1 Niyo, Sofali Mnaamati amhitula kugamba, 2 Fanyanyi zangu zanitenda nihitule,

kwaviya hikudaha kukekindila naho.

3 Naiivaga milosi yako hikudaha kufinyiliza,

no umanyi wangu wanigambila nihitule.

4 Weye mafani kuijala mbuli ino,

kugamba kukongela kale Mnungu umwo eze amuumbe mnt'hu mwe isi,

5 Mwiihi naakeone mhumi kwa lupisi du,

kinyemi cha heekumvika Mnungu ni kwa lupisi luguhi du.

6 Kukeduvya kwawe kubula mpaka kwe mbingu,

kuketogola kwakwe kukulisa,

7 Mna naadulwe hale enga nt'hagata,

wadya wammanyize nawakeuze,

ekuhi elo.

8 Naage enga sozi, enga maona ya nekilo,

na yehe haoneke naho.

9 Uyo amuwonaga hamuone naho, hegu hadya nakekala hahatambulwe naho.

10 na wanawe nawo nawalihe yose tate yawe ayo awahokile wakiwa, na wana wakwe nawalombeze mbazi kwa wakiwa.

11 Akeonaga ana ludole mwo ubwanga wakwe,

mna hiyo lupisi lutali naabanike na kuuya mwo luvumbi.

12 Want'hu waihi wanda na kinyemi wakadamanya mbuli ziihile,

naho ni enga kint'hu kimwile mwo mnomo wakwe,

13 ikanda hakudaha kuuleka uwihi wakwe.

mna waufanyanya mwo umoyo wawe.

14 hata ivo nk'hande iyo neinde isungu mwe nda yakwe,

nekinde na usungu mkali enga wa nyoka.

15 Mwavu kamela ugoli wa soni naye naautahike,

Mnungu naauguhe ugoli uwo.

16 Icho wakumela want'hu waihile ni enga usungu wa nyoka,

niwakome enga mnt'hu alumigwe ni nyoka.

17 Yehe naye haaonele kinyemi vint'hu vedi vi mwe isi,

yehe haaonele kinyemi uki na mele vikuseeela enga vizuto.

18 Viya avizungule naavilekele hahena kuvidya,

ugoli aupatile haaonele kinyemi

19 kwaviya kawahujila wakiwa na kuwaleka hahena kint'hu,

kawahoka nyumba zawe wazizengile wenye.

20 Yehe ni mgila naho hakwiguta,

naho haadahe kuyokola chochose akuhuwila,

21 ivo hahana chochose kisigale kwajili yakwe,

na ugoli wakwe ubula uheelo.

22 Mwo wingi wo upati wakwe,

makunt'ho nayamwizile kwa ludole.

23 Awo waihi waleke wadye enga ivo wakuunga,

Mnungu naawasengele kwa maya makulu.

24 Umwo wakanyilika sime ya kilama,

msale we shaba nouwapate.

25 Naasomole msale mwo mwili wakwe,

na msale usongoke ungaile nousomolwe mwo mgongo wakwe,

vitiso fe file nevimpate.

26 Kindolo chakwe nekibanangwe,

Mnungu nalagize moto ubanange,

icho kisigale mwe nyumba yakwe nechokwe.

27 Mbingu neigubule uwihi wakwe,

isi neilonge uwona.

28 Ugoli wakwe noubanangwe

mwe maya yatendese ya Mnungu.

29 Icho nicho Mnungu akumwink'ha mnt'hu mwavu.

uheelo ukulavigwa ni Mnungu ni kwajili yawe.