1 यहोवे बोलेया, "यहूदा रे लोका रा पाप लोए री छीणी ओर ईरे री नोका साथे लिखी राखेया, से तिना रे दिलो री पट्टिया पाँदे ओर तिना री बेदिया रे सींगो पाँदे बी खणेया राए। 2 तिना री मूर्तिया री बेदिया ओर अशेरा नाओं री देविया जो अरे डाल़ा निठे ओर ऊच्चे टीलेया पाँदे ए, सेयो तिना रे बच्चेया खे बी याद रओईया। 3 ओ मेरे पवित्र पाह्ड़, तूँ जो मैदानो दे ए, तेरी तअन-सम्पत्ति ओर पण्डार तेरे पापो रिया बजा ते मां तेरे दुश्मणा ते लुटणे देणा ओर तेरी आराधना री ऊच्ची जगा बी जो तेरे देशो रे ए। 4 तूँ आपणे ई दोषो रिया बजा ते आपणे तेस देशो रा अक्कदार नि रणा जो मैं ताखे देई राखेया ओर मां एड़ा करना कि तुसा अणजाणे देशो रे आपणे दुश्मणा री सेवा करनी, कऊँकि तुसे मेरे रोषो री आग एड़ी पड़काई राखी कि जो सदा बल़दी रणी।"

5 यहोवा ये बोलोआ, "से माणूं स्रापित ए, जो माणूंए पाँदे परोसा राखोआ ओर तेसरा साअरा लओआ, जेसरा मन यहोवे ते पटकी जाओआ। 6 से माणूं रेगिस्तान देशो रे सूके डाल़ो जेड़ा ऊणा ओर कदी पलाई नि देखणी। से बंजर, रेगिस्तान ओर सापड़ी वाल़ी जमीना दे बसणा। 7 तन्य से माणूं, जो यहोवे पाँदे परोसा राखोआ, जिने परमेशर आपणा आधार मानी राखेया ओ। 8 से माणूं तेस डाल़ो जेड़ा ऊणा जो नदिया रे कनारे पाँदे लगी रओआ ओर जेतेरी जड़ पाणिए कनारे फैली री ओ, जेबे तूप पड़नी तेबे तेस पाँदे नि लगणी, तेसरे पत्ते अरे रणे ओर सूके सालो रे बी तिना रे बारे दे कोई डर नि ऊँदा, कऊँकि से तेबे बी फल़दा रणा।"

9 आदमिया रा मन तो सबी चीजा ते जादा तोखा देणे वाल़ा ओआ, तिदे कदी बी ठीक नि ऊणे वाल़ा रोग लगी रा, एतेखे कुण ठीक करी सकोआ? 10 आऊँ यहोवा मनो खे टोल़ोआ ओर दिलो खे परखूँआ, ताकि हर एकी खे तेसरे चाल-चलणो रे मुताबिक मतलब तेसरे कामो रा फल देऊँ।* 11 जो अन्याय साथे तअन कट्ठा करोआ से तेस तीतरो जेड़ा ओआ जो दूजी चिड़िया रे दित्ते रे अण्डे सेतोई, तेसरी आदी उम्रा रेई से तेस तअनो खे छाडी जाओआ ओर अन्तो रे से मूर्ख ई ठईरोआ। 12 म्हारी पवित्र आराधना करने री जगा शुरूओ ते ऊच्ची जगा पाँदे राखे रे तेजोमय सिंहासनो जेड़ी ए। 13 ओ यहोवा, ओ इस्राएलो रे आधार, जितणे ताखे छाडी देओए सेयो सारे शर्मिंदा ऊणे, जो तांते पटकी जाओए तिना रे नाओं जमीना देई लिखे जाणे, कऊँकि तिने बह्ईंदी सूबल़ यहोवा छाडीता रा।

14 ओ यहोवा, कृपा तू माखे ठीक कर, तेबे आऊँ ठीक ऊई जाणा, माखे बचा, तेबे आऊँ सच्ची बची जाणा, कऊँकि आऊँ तेरी ई स्तुति करूँआ। 15 सुण, यहूदा रे लोक मांते पूछणे लगी रे, "यहोवे रा वचन केयी रया? से यबु पूरा ऊई जाणा!" 16 पर तूँ मेरा आल जाणेया, मैं तां पीछे चलदे ऊए जल्दबाजी करी की गवाल़े रा काम नि छाडेया, ना मैं तेसा आऊणे वाल़ी मुसीबता रे दिनो री इच्छा कित्ती, जो कुछ मैं बोलेया, से तां सामणे था। 17 ओ यहोवा, तू माखे नाश नि कर। मुसीबता रे बखते तूँ ई मेरी शरणा री जगा ए। 18 इजी री खातर एबे ओ यहोवा, मेरी उम्मीद टूटणे नि दे, मेरे सताणे वाल़े री उम्मीद ई टूटो; तिना खे ई नाश कर, पर माखे उदासिया ते बचा; तिना पाँदे मुसीबत ल्याओ ओर तिना खे चूर-चूर करी दे!

19 यहोवे माखे ये बोलेया, "यिर्मयाह, जाई की सदर बड़े द्वारो पाँदे खड़ा ऊई जा जिसिये यहूदा रे राजा, बल्कि यरूशलेम शईरो रे सब रणे वाल़े बारे-पीतरे आया-जाया करोए" 20 ओर तिना लोका खे बोल, "ओ यहूदा रे राजा ओर सारे यहूदियो, ओ यरूशलेम शईरो रे सारे रणे वाल़ेयो ओर सब लोको जो एस बड़े द्वारो रे ऊई की पीतरे जाओए, यहोवे रा वचन सुणो।" 21 यहोवा ये बोलोआ कि सावधान रओ, रामो रे दिने कोई समानो रा बोजा नि चको ओर ना कोई बोजा यरूशलेम शईरो रे बड़े द्वारो ते पीतरे लई जाओ।* 22 रामो रे दिने आपणे-आपणे कअरो ते बी कोई बोजा बारे नि ल्याओ ओर ना कोई काम काज करो, बल्कि तेसा आज्ञा रे मुताबिक जो मैं तुसा रे बुजुर्गा खे दित्ती थी, रामो रे दिनो खे पवित्र मानेया करो। 23 पर तिना रे पीतरे मेरे नियम नि सुणे ओर ना कान लगाया, बल्कि इजी ते उल्टा हठ कित्ती ताकि सुणो नि ओर ताड़ना ते पनि माने। 24 पर जे तुसे लोक सच्ची खेई मेरी सुणो, यहोवा ईंयाँ बोलोआ, "ओर रामो रे दिने एस शईरो रे बड़े द्वारो ते पीतरे कोई बोजा नि लई जाओ ओर रामो रे दिनो खे पवित्र मानो ओर तेस दिने कोई काम काज नि करो, 25 तेबे तो दाऊदो री गद्दिया पाँदे बैठणे वाल़ा राजा, रथ ओर कोड़ेया पाँदे चढ़े रे परदान ओर यहूदा रे लोक ओर यरूशलेम शईरो रे रणे वाल़े एस बड़े द्वारो रिये पीतरे जाया करने ओर ये शईर सदा बसेया रा रणा। 26 लोक होमबलि मेलबलि नज्जो री बलि, लोबान ओर तन्यवादो री बलि लई की यहूदा रे शईरो ते ओर यरूशलेम शईरो रे नेड़े-तेड़े ते, बिन्यामीन देश ओर थालले देशो ते, पाह्ड़ी देश ओर दक्खण यहूदा रे देशो ते, यहोवे रे मन्दरो रे आया करने। 27 पर जे तुसे मेरी सुणी की रामो रे दिनो खे पवित्र करी की नि मानोगे ओर तेस दिने यरूशलेम शईरो रे बड़े द्वारो ते बोजा लई की पीतरे जांदे रओगे, तो मां यरूशलेम शईरो रे बड़े द्वारो रे आग लगाणी ओर तिजी साथे यरूशलेम शईरो रे मईल बी फूखी जाऊणे ओर से आग फेर नि बीजणी।"