1 तेस सालो देई यिर्मयाह नबीए इजी रे बारे दे चिट्ठी, तिना गुलामिया दे जाणे ते बचे दे बुजुर्ग, पुरोईत, भविष्यबक्तेया ओर तिना सबी लोका गे पेजी जिना खे नबूकदनेस्सर राजा यरूशलेम शईरो ते बेबीलोनो खे कैद करी की लईगा था।* 2 ये पर्ची तेस बखते पेजी, जेबे यकोन्याह राजा ओर राजमाता, खुसरे, यहूदा, यरूशलेम शईरो रे परदान, ल्वार ओर बाकी कारीगर यरूशलेम शईरो ते कैदिया रे रूपो दे चली गे थे। 3 ये पर्ची शापानो रे पाऊ एलासा ओर हिल्किय्याह रे पाऊ गमर्याह रे आथो दे पेजी, जो यहूदा रे राजा सिदकिय्याहे बाबेलो रे राजा नबूकदनेस्सरो गे बाबेलो खे पेजे। 4 तिदे लिखी राखेया था: जितणे लोक मैं यरूशलेम शईरो ते बन्दी बणाई की बाबेलो दे पऊँचाई ते रे, तिना सबी खे इस्राएलो रा परमेशर यहोवा ईंयाँ बोलोआ, 5 "तेती कअर बणाई की तिदे बसी जाओ, तेस देशो दे बसी जाओ। बगीचे लगाई की तेतेरे फल खाओ। 6 ब्या करी की माठे-बेटिया जमाओ ओर आपणे माठेया खे जवाणसा ब्याओ ओर आपणी बेटिया मर्दा खे ब्यायी देयो, ताकि सेयो बी बच्चे पैदा करो ओर सेयो कम नि ओ, बल्कि तेती बेबीलोनो दे बढ़दे जाओ। 7 पर जेस शईरो दे मैं तुसे बन्दी बणाई की पेजी राखे, तेथो री पलाईया री कोशिश करेया करो ओर तेथो रे कल्याणो खे यहोवे ते प्रार्थना करेया करो। कऊँकि तेथो रे कल्याणो ते तुसा रा बी कल्याण ऊणा। 8 कऊँकि इस्राएलो रा परमेशर, सेना रा यहोवा तुसा खे ईंयाँ बोलोआ कि तुसा रे जो भविष्यबक्ता ओर मरे रे लोका री आत्मा साथे गल्ला करने वाल़े तुसा बीचे ए, सेयो तुसा खे बईकाई नि सको ओर जो दर्शण सेयो तुसा रिया तँईं देखोए, तिना रिया तरफा खे कान नि लगाओ। 9 कऊँकि सेयो भविष्यबक्ता मेरे नाओं ते तुसा खे चूठी भविष्यबाणी सुणाओए, मैं सेयो नि पेजे, मां यहोवे री येई बाणी ए।"

10 यहोवा ईंयाँ बोलोआ, "जेबे तुसा खे बाबेलो दे गये दे सत्तर साल पूरे ऊणे तेबे मां तुसा री खबर-सम्बाल़ लणी ओर आपणा ये सुन्दर वचन कि मां तुसे यरूशलेमो रिया जगा दे वापस ल्याऊणे, पूरा करना। 11 कऊँकि यहोवे री ये बाणी ए कि जो शान्तिया री योजना आऊँ तुसा रे बारे दे करूँआ, आऊँ तिना खे जाणूंआ, सेयो नुकशाणो रिया नि ए, बल्कि पलाईया रिया ए ओर मां अन्तो दे तुसा री उम्मीद पूरी करनी। 12 तेबे तेस बखते तुसा मेरा नाओ लणा। ओर तुसा मां नेड़े आऊणा ओर आई की मांते प्रार्थना करनी ओर मां तुसा री सुणनी। 13 तुसा लोका आऊँ टोल़ना ओर आऊँ तुसा खे मिलणा, कऊँकि तुसे आपणे पूरे मनो ते मांगे आऊणे। 14 आऊँ तुसा खे मिलणा, यहोवे री येई बाणी ए ओर मां तुसे गुलामिया ते वापस ल्याऊणे ओर तुसे तिना सबी जातिया ओर जगा दे जेथा ते मैं तुसे जबरदस्ती निकयाल़े थे ओर तुसे कट्ठे करी की एते जगा दे वापस ल्याऊणे जेथा ते मैं तुसे बन्दी बणवाई की निकयाल़ी ते थे, यहोवे री येई बाणी ए।" 15 तुसे बोलो तो आए कि यहोवे आसा रिया तँईं बाबेलो दे नबी पैदा करी राखे। 16 पर जो दाऊद राजे री गद्दिया पाँदे बैठी रा ओर जो प्रजा एस शईरो दे रओई, मतलब तुसा रे यहूदा रे लोक जो तुसा साथे गुलामिया दे नि गये, तिना सबी रे बारे दे सेना रा परमेशर यहोवा ईंयाँ बोलोआ, 17 यहोवा बोलोआ, "सुणो, मां आज्ञा खे नि मानणे वाल़े लोका बीचे तलवार चलवाणी, अकाल़ ओर बमारी फैलाणी ओर सेयो इतणे बुरे दाऊगल़े जेड़े करने जो बुरे ऊणे रिया बजा ते खाऊँदे नि। 18 मां तलवार, अकाल़ ओर बमारी लई की तिना रा पीछा करना ओर एड़ा करना कि सेयो तरतिया रे राज-राज दे मारे-मारे फिरने ओर तिना सबी जातिया बीचे जिना रे वशो दे मां सेयो जबरदस्ती करी देणे, तिना री एड़ी दशा करनी कि लोक तिना खे देखी की हैरान ऊणे ओर तिना चाड़िया बजाणियां ओर तिना रा मजाक करना ओर तिना खे देखी की स्राप देया करना। 19 कऊँकि जो वचन मैं आपणे दास भविष्यबक्ते रे जरीये तिना गे बड़ी मईणत करी की पऊँचाए थे, तिने सेयो नि सुणे, यहोवे री येई बाणी ए।"

20 इजी री खातर ओ सारे बन्दियो, जो मैं यरूशलेम शईरो ते बाबेलो खे पेजी राखे, तुसे यहोवे रा ये वचन सुणो। 21 परमेशर यहोवा कोलायाह रे पाऊ अहाब ओर मासेयाह रे पाऊ सिदकिय्याह तुसा खे मेरे नाओं ते चूठी भविष्यबाणी सुणाओए, तिना रे बारे दे इस्राएलो रा परमेशर, सेना रा यहोवा ईंयाँ बोलोआ कि सुणो, "मां सेयो बाबेलो रे राजा नबूकदनेस्सरो रे वशो दे करी देणे ओर तिना सेयो तुसा सामणे काई देणे। 22 सारे यहूदी बन्दी जो बाबेलो दे रओए, तिना रा उदारण देई की ये स्राप देया करना, यहोवा ताखे सिदकिय्याह ओर अहाबो रे जेड़ा करो, जो बाबेलो रे राजे सेयो दोनो आगी रे फुकी ते। 23 यो कोलायाह रे पाऊ अहाब ओर मासेयाह रे पाऊ सिदकिय्याह रे लोक थे, तिने इस्राएली लोका बीचे मूर्खता रे काम कित्ते, मतलब आपणे पड़ोसिया री जवाणसा साथे व्याभिचार कित्तेया ओर बिना मेरी आज्ञा ते मेरे नाओं ते चूठे वचन बोले। एतेरा जाणने वाल़ा ओर गवाह् आऊँ आपू ए, यहोवे री येई बाणी ए।"

24 नेहेलामी शमायाह खे तूँ ईंयाँ बोल, कि इस्राएलो रे परमेशर यहोवे ईंयाँ बोली राखेया, 25 "कऊँकि तैं यरूशलेम शईरो रे सबी रणे वाल़ेया खे ओर सबी पुरोईता खे ओर मासेयाह रे पाऊ सपन्याह पुरोईतो खे आपणे ई नाओं री एड़ा लिखी की पर्ची पेजी राखी कि 26 यहोवे यहोयादा पुरोईतो रे मरने ते बाद तेसरी जगा पाँदे तूँ पुरोईत बणाईता रा ताकि तूँ यहोवे रे मन्दरो दे रखवाल़ा ऊई की जितणे तेती पागलपन करोए ओर भविष्यबक्ता बणी की बैठी रे तिना खे लक्कड़ो दे ठोके ओर तिना रे गल़ो दे लोए रे पट्टे बाने। 27 इजी री खातर यिर्मयाह अनातोत शईरो रा जो तुसा रा भविष्यबक्ता बणी की बैठी रा, तुसे से बन्दी कऊँ नि बणाया? 28 तिने तो आसा लोका खे बाबेलो दे ये सन्देसा पेजेया था कि गुलामी तो बऊत दिन तक रणी, इजी री खातर कअर बणाई की तिना दे रओ ओर बगीचे लगाई की तिना रे फल खाओ।"

29 ये पर्ची सपन्याह पुरोईते यिर्मयाह भविष्यबक्ते गे पढ़ी की सुणाई। 30 तेबे यहोवे रा ये वचन यिर्मयाह गे पऊँचेया, "सबी गुलामा गे ये सन्देसा पेज, 31 यहोवा नेहेलाम शईरो रे शमायाह रे बारे दे ईंयाँ बोलोआ कि शमायाहे मेरे बिना पेजे तुसा गे जो भविष्यबाणी कित्ती ओर तुसा खे चूठो पाँदे परोसा दलाया, 32 इजी री खातर यहोवा ईंयाँ बोलोआ कि सुणो, आऊँ तेस नेहेलामी शमायाह ओर तेसरे कुलो खे सजा देणा चाऊँआ, शमायाह रे वंशो रा कोई बी नि बचणा ओर जो पलाई आऊँ आपणी प्रजा री करने वाल़ा ए, से तेस देखी नि सकणी, कऊँकि तिने यहोवे ते फिरने रिया गल्ला बोली राखिया, यहोवे री येई बाणी ए।"