1 यहोवे रा जो एक ओर सन्देश यिर्मयाह गे पऊँचेया से ईंयाँ ए: 2 "इस्राएलो रे लोका रा परमेशर यहोवा ताखे ईंयाँ बोलोआ कि जो वचन मैं तांगे बोली राखे तिना सबी खे कताबा दे लिखी लो। 3 कऊँकि यहोवे री ये बाणी ए, से दिन आऊणे जेबे मां आपणी इस्राएली ओर यहूदी प्रजा गुलामिया ते वापस ली आऊणी ओर जो देश मैं तिना रे पितरा खे दित्तेया था, तिदे मां सेयो फेर ल्याऊणे ओर सेयो फेर तेतेरे अधिकारी ऊणे, यहोवे री येई वाणी ए।" 4 जो वचन यहोवे इस्राएली ओर यहूदिया रे लोका रे बारे दे बोले थे, सेयो ईंयाँ ए: 5 यहोवा बोलोआ, "थरथराणे वाल़ी आवाज सुणने लगी री, तिदे शान्ति नि, पर डर ईए। 6 पला पूछो तो ओर देखो, क्या मर्दो खे बी जमणे री पीड़ा उठोईया? तेबे क्या बजा ए कि सारे मर्द बच्चा जमाणे वाल़ी जवाणसा जेड़े आपणा-आपणा लक आथो साथे दबाई की दिशणे लगी रे? सबी रे मुंए रा रंग फीका कऊँ ऊईगा रा? 7 हाय, हाय, से दिन कितणा पारी ऊणा! तेस जेड़ा ओर कोई दिन नि ए, से याकूबो री मुसीबता रा दिन ऊणा, पर से तेसते बी छुड़ाया जाणा।*"

8 सेना रे यहोवे री ये बाणी ए कि तेस दिने तेसरा राखेया रा जूँगड़ा तुसा री क्याड़िया ते तोड़ी देणा ओर मां तुसा रे बानो रे टुकड़े-टुकड़े करी देणे ओर परदेशिया फेर तिना ते आपणी सेवा नि कराई सकणी। 9 इस्राएल ओर यहूदा रे लोका दूजे देशो री बी सेवा नि करनी पर तिना आपणे परमेशर यहोवे री सेवा करनी ओर तिना आपणे राजा दाऊदो री सेवा करनी। मां से राजा तिना पाँदे राज करने खे पेजणा।* 10 इजी री खातर ओ मेरे दास याकूब, तेरिया तँईं यहोवे री ये बाणी ए कि डर नि, ओ इस्राएल, कबरा नि, कऊँकि मां दूर देशो ते तूँ ओर तेरा कराना गुलामिया रे देशो ते छुड़ाई की ल्याऊणा। तेबे याकूब वापस ऊई की, चैन ओर सुखो साथे रणा ओर तेसखे कोई डराई नि सकदा। 11 कऊँकि यहोवे री ये बाणी ए कि, तुसा रा उद्धार करने खे आऊँ तुसा साथे ए, इजी री खातर मां तिना सबी जातिया रा अन्त करी देणा, जिना रे मैं सेयो तित्तर-बित्तर करीते थे, पर तुसा रा अन्त नि करना, मां तुसा खे सोची-समजी की सजा देणी ओर तुसे किंयाँ बी निर्दोष नि ठराणे।

12 यहोवा ईंयाँ बोलोआ, "तेरे दु:खो री कोई दवा नि ए ओर तेरा जख़्म गईरा ओर दु:ख देणे वाल़ा ए। 13 तेरा जख्मो खे ठीक करने वाल़ा कोई आदमी नि ए। तुसे ठीक नि ऊई सकदे। 14 तेरे सारे दोस्त ताखे पूली गे, सेयो तुसा री खबर-सम्बाल़ नि लंदे, कऊँकि तेरे बड़े बुरे काम ओर पापो रिया बजा ते, मैं दुश्मण बणी की तुसे काई राखे, मैं सख्त बणी की सजा देई राखी। 15 इस्राएल ओर यहूदा तुसे आपणे जख़्मो रिया बजा ते कऊँ चींगोए? तुसा री पीड़ा रा कोई लाज नि ए। तेरे बड़े बुरे काम ओर पारी पापो रिया बजा ते मैं तुसा के ये सजा देई राखी। 16 पर जितणे एबे तुसा खे नाश करोए, सेयो आपू ई नाश ऊणे इस्राएल ओर यहूदा तेरे बिरोदी आपू सारे के सारे गुलामिया रे जाणे ओर ताखे लुटणे वाल़े आपू लुटणे ओर जितणे तेरा तअन छुड़ाओए, तिना रा तअन मां छुड़वाणा। 17 मां तेरा लाज करी की तेरे जख़्म ठीक करने, यहोवे री येई बाणी ए, कऊँकि तेरा रा नाओं ठुकराया रा पड़ी रा, से तो सिय्योन ए, तेसरी फिकर कोई नि करदा।" 18 यहोवा बोलोआ, "आऊँ याकूबो रे तम्बूए खे गुलामिया ते वापस ल्याऊँआ ओर मां तेसरे कअरो पाँदे दया करनी, यरूशलेम शईर आपणे ई खण्डहरो पाँदे फेर बसणा ओर मईल पईलके जेड़े फेर बणी जाणे। 19 तेबे तेती रणे वाल़े लोका बीचा ते तन्य बोलणे ओर खुशी मनाणे री आवाज सुणनी। 20 मां तिना रा वैभव बढ़ाणा ओर सेयो थोड़े नि ऊणे। तिना रे बच्चे पुराणे बखतो जेड़े ऊणे, तिना री मण्डल़ी मां सामणे स्थिर रणी ओर जितणे तिना पाँदे अन्देर करोए, मां तिना खे सजा देणी। 21 तिना रा राजा तिना ई बीचा ते ऊणा ओर जो तिना पाँदे राज करोगा, से तिना ई बीचा ते पैदा ऊणा, मां से आपू नेड़े बुलाणा ओर से मां नेड़े आई बी जाणा, कऊँकि एड़ा कोई नि ए जो आपू मां नेड़े आई सको। यहोवे री येई बाणी ए। 22 तेस बखते तुसे मेरी प्रजा ठईरने ओर आऊँ तुसा रा परमेशर ठईरना।" 23 देखो, यहोवे री जल़ना रा तूफान चलणे लगी रा, से बऊत प्रचण्ड तूफान ए, दुष्टा रे सिरो पाँदे से जोरे की लगणा। 24 जदुओ तक यहोवा आपणा काम नि करी चुकोगा ओर आपणी योजना खे पूरी नि करी चुकोगा, तदुओ तक तेसरा पड़केया रा रोष शान्त नि ऊणा। तुसे आऊणे वाल़े दिना दे तुसे जो तेसरे लोक ए एसा ई गल्ला खे समजी सकणे।