Jeremias 9

1 जे मेरा सिर पाणिये की परेया रा ऊँदा, ओर मेरिया आखी आसूआ री सूबल़ ऊँदी, तो आऊँ आपणे नाश ऊए रे मेरे कई लोका रिया तँईं दिन रात रोंदा रंदा। 2 खरा ऊँदा कि माखे उजाड़ जगा दे यात्रिया री कोई रणे खे जगा मिलदी, ताकि आऊँ आपणे लोका खे छाडी की तेथी चली जांदा! कऊँकि मेरे सारे लोक परमेशरो रिया तँईं विश्वासघाती थे। 3 यहोवे माखे बोलोआ, "मेरे लोक आपणी-आपणी जीबा खे धनुषो ते छाडे दे बाणो जेड़े चूठ बोलणे खे त्यार करोए ओर देशो दे तागतबर तो ऊईगे, पर सच्चाईया रिया तँईं नि, सेयो बुराईया पाँदे बुराई बढ़ांदे जाओए ओर सेयो माखे जाणदे ई नि, यहोवे री येई बाणी ए।" 4 ओ यिर्मयाह, "आपणे सबी दोस्ता ते सम्बल़ी की रओ, आपणे रिश्तेदारो पाँदे बी परोसा नि राखो, कऊँकि हर एक पाई पक्का कपटी ऊणा। तिना एकी-दूजे रे बारे चूठ बोली की से पकड़वाणा।" 5 तिना एक-दूजा ठगणा ओर सच्च नि बोलणा, तिने चूठ बोलणा ई सीखी राखेया ओर कपटो साथे ई काम करोए। 6 यिर्मयाह, हर एक कपटो बीचे रओआ, इजी बजा ते सेयो मेरा ज्ञान नि चांदे, यहोवे री येई बाणी ए। 7 इजी री खातर सेना रा यहोवा ये बोलोआ, "देख, मां सेयो तपायी की परखणे, कऊँकि आपणी प्रजा ऊणे रिया बजा ते आऊँ तिना साथे ओर कुछ नि करी सकदा। 8 तिना री जीब काल़ो रे तीरो जेड़ी छेदणे वाल़ी ए, तिना रिया जीबा ते कपटो रिया गल्ला निकल़ोईया, सेयो मुंए ते तो एकी-दूजे साथे मेलजोलो रिया गल्ला करोए, पर मन ई मन एक-दूजे खे काणे री योजना करदे रओए। 9 मां तिना खे एड़ी गल्ला री सजा देणी, मां एड़ी जातिया ते बदला लणा", यहोवे री येई बाणी ए। 10 इजी री खातर मां तिना माणूंआ रिया तँईं रोणा जो पाह्ड़ो दे रओए ओर मां शोगो रे गीत गाणे ओर उजाड़ जगा री तराईया खे दु:खो रे गीत गाणे, कऊँकि सेयो एड़े फूखी गे रे कि कोई तिना बीछीए नि चलदा ओर तिना रे केसी डांगरो रा एकी दूजे खे बुलांदे ऊए पनि सुणदा, डांगर-पंछी सारे नठीगे रे। 11 यहोवा ये बी बोलोआ कि मां यरूशलेम खण्डहर बणाई की गीदड़ा रे रणे री जगा बणाई देणी ओर यहूदा रे शईर एड़े उजाड़ी देणे कि तिना दे कोई नि बसणा।*9:11 यशा. 25:2

12 मैं बोलेया, "जो समजदार माणूं ए, सेई इजी रा पेत समजी सकोआ ओर जिने यहोवे रे मुंए ते इजी री बजा सुणी राखी सेई बताई सकोआ। देशो रा नाश कऊँ ऊआ? से जंगल़ो जेड़ा एड़ा कऊँ फूखी गा कि तिसिये कोई नि चलदा?" 13 यहोवे ज्वाब दित्तेया, "कऊँकि तिने मेरे बिधान जो मैं तिना ते आगे राखेया था छाडीता, ओर ना मेरी गल्ल मानी ओर तिजी रे मुताबिक चले। 14 बल्कि सेयो आपणी हठ करी की बाल नाओं रे देवतेया पीछे चले, जेड़ा तिना रे बुजुर्गे तिना खे सिखाया। 15 इजी बजा ते सेना रा यहोवा इस्राएलो रा परमेशर ईंयाँ बोलोआ कि सुण, मां आपणी एसा प्रजा खे कऊड़ी चीज खुलाणी ओर विष पल़्याणा।*9:15 पज. 69:21, यिर्म. 23:15 16 मां सेयो लोक एड़ी जातिया बीचे तित्तर-बित्तर करने जिना खे ना तो सेयो ओर ना तिना रे बुजुर्ग जाणो थे ओर जदुओ तक तिना रा अन्त नि ऊई जाओगा, तदुओ तक मेरी तरफा ते तलवार तिना पीछे पड़ी री रणी।"

यरूशलेम शईरो रिया तँईं रोणा

17 सेना रा यहोवा ईंयाँ बोलोआ, "सोचो कि क्या ऊणे लगी रा? ओर रोणे वाल़िया खे बुलाओ, अन्तिम संस्कारो रे गीत गाणे वाल़िया सबी ते खरिया जवाणसा खे बुलाओ। 18 तिना खे बोलो कि फटाफट आओ ओर शोगो रे गाणे गाओ ताकि म्हारिया आखी ते आसू निकल़ी जाओ ओर म्हारी पलका ते पाणी निकल़ो।" 19 यरूशलेम शईरो रे लोका ते शोगो रा ये गाणा सुणोआ, "आसे केड़े नाश ऊईगे, आसे शर्मिंदा कऊँ ऊईगे, कऊँकि आसा खे आपणा देश छाडणा पड़ेया ओर म्हारे कअर दुश्मणे बर्बाद करीते दे ए।" 20 इजी री खातर ओ जवाणसो, यहोवे रा ये वचन सुणो ओर तेसरी ये आज्ञा मानो, तुसे आपणी-आपणी बेटिया खे शोगो रा गाणा ओर आपणी-आपणी पड़ोसणिया खे दु:खो रा गाणा सिखाओ। 21 कऊँकि मौत म्हारी द्वारिया रिये ऊई की म्हारे मईलो दे कूसी की आई री, ताकि म्हारी सड़का दे ओर चौका दे म्हारे बच्चेया खे ओर म्हारे जवाना खे काओ। 22 तूँ बोल, "यहोवा ये बोलोआ कि माणूंआ री लाशा एड़िया पड़ी रिया रणियां जेड़ी खाद डोरूआ पाँदे ओर पूल़े बाडणे वाल़ेया पीछे पड़े रे रओए ओर तिना खे कोई चकणे वाल़ा नि ऊणा।"

परमेशरो दे कमण्ड

23 यहोवा ईंयाँ बोलोआ, "समजदार आपणी समजा पाँदे कमण्ड नि करो, ना सामर्थी आपणी सामर्था पाँदे, ना अमीर आपणे पैसे पाँदे कमण्ड करो, 24 पर जो कमण्ड करो से एसा गल्ला पाँदे ई कमण्ड करो कि से माखे जाणोआ ओर समजोआ कि आऊँ ई से परमेशर यहोवा ए, जो तरतिया पाँदे करूणा, न्याय ओर तर्मो साथे काम करोआ, कऊँकि आऊँ इना गल्ला तेई खुश रऊँआ।"*9:24 1 कुरि. 1:31, 2 कुरि. 10:17 25 यहोवा ईंयाँ बोलोआ, "कि एड़े दिन आऊणे वाल़े ए कि जिना रा खतना ऊए राए, तिना खे मां बिना खतना कित्ते रे जेड़ी सजा देणी,*9:25 रोम. 2:25 26 मतलब मिस्री, यहूदी, एदोमी, अम्मोनी, मोआबिया खे ओर तिना रेगिस्तानो रे रणे वाल़ेया खे जो आपणी दाड़िया रे बाल़ कटायी राखोए, कऊँकि यो सब बिना खतने रिया जातिया ए जो इस्राएली नि ए ओर इस्राएलो रे सारे कराने रे मन बी परमेशरो रिया तरफा खे बदले दे नि ए।"*9:26 प्रेरि. 7:51